-->
U3F1ZWV6ZTU2NjExMzY3MDVfQWN0aXZhdGlvbjY0MTMyODcxNDc2

تحليل عميق لاقوى مشهد فى مسلسل ونوس 2016


ونوس | 2016 




العملاق "يحيى الفخراني" وقدرته المذهلة على إبراز مغناطيسية وتلون الشيطان في واحد من أعمق وأجمل مشاهد مسلسل "ونوس". المسلسل اتعرض في 2016، وهو مقتبس عن المسرحية الشهيرة "فاوست"، واللي بتدور أحداثها عن إنسان باع روحه للشيطان باتفاق ما بينهم.
المشهد بيبدأ بحوار يبدو طبيعي، لكنه بيروح لعمق مختلف تماماً لمّا "ونوس" بدأ يفضفض مع "ياقوت" عن آلامه وأحزانه. في أول دقيقة من المشهد، الشيطان بينفي عن نفسه أي مسئولية في المصايب اللي بتحصل للبشر، لاحظوا السخط اللي في صوت "الفخراني" ونظرة عينه اللي فيها غضب مكتوم من الظلم اللي بيحصل له من الناس. الموسيقى بتعلى في لحظة معينة عشان تسيب تأثير بإن خطايا البشر من اختيارهم، واللي بتتزامن بالظبط مع جملة "لكن هم اللي بيروحوا لها برجليهم. مالي أنا بقى".

مع استمرار الحوار في الدقيقة التانية، "ونوس" بيحسد البشر على نعمة الحياة. لاحظوا نظرة الحقد المخيفة في عينه في الدقيقة 1.19، ونبرة صوته المرتعشة وهو بيوصّف حياة البشر بإنها ممتعة ومتنوعة. الأداء العبقري ليحيى الفخراني قدر إنه يوصّل إيحاء للمشاهد إنه بيبكي لكن من غير دموع، وهو بيتكلم عن وحدته ولعنته. لمّا شفت نظرة عين "ونوس"، افتكرت جملة الرائع "أحمد خالد توفيق" في واحدة من رواياته عن "يهوذا" لمّا اتكلّم عن "النظرة التعسة الآثمة للخاطئ الذي لا يملك سوى أن يخطئ".

المشهد بينتهي بنقلة عبقرية على مستوى الأداء لمّا "ونوس" بيتحول فجأة من لحظة التأثر الشديدة لضحكة إنفعالية طويلة عشان تعكس مرة تانية تلوّن الشيطان ومدى تأثيره على البشر في المواقف المختلفة. في النهاية، الموسيقى المتوترة الرائعة للموسيقار التونسي "أمين بوحافة" أضافت كتير للمشهد، وقدرت إنها تلعب على مشاعر المشاهدين بشكل مبهر. تقدروا تشوفوا المشهد على لينك يوتيوب ده




ـــــــــــــــــــــــــــــــــــــــــــــ


جميع حقوق الطبع والنشر محفوظة لصفحة 
Behind The Scenes
الاسمبريد إلكترونيرسالة