شرح فيلم Tenet - تفسير فيلم Tenet - مراجعة فيلم Tenet

صباح او مساء الخير حسب الوقت اللي بتقرأ فيه الموضوع . بما انك دخلت تقرأ الموضوع ده فـ انت اكيد واحد من الملايين اللي اتفرجوا على فيلم Tenet للمخرج العالمي كريستوفر نولان ومش فهموه وكعادة افلام نولان صعب جدا نفهمها من اول مرة  وبصراحة انا كمان كنت واحد من الملايين دى لحد مالاقيت الشرح ده وقلت لازم اشاركه معاكم . يلا بينا ؟ 

مراجعة فيلم TENET
تفسير فيلم TENET


شرح فيلم Tenet


مبدأيا الفيلم مفيهوش سفر عبر الزمن اصلا .. الفيلم عبارة عن دواير مغلقة لكل شخصية الدواير دي بتتقاطع مع بعض وعلشان نفهم الفيلم بصورة بسيطة هنفك مع بعض التشابك اللي حصل بين كل دايرة مغلقة مع التانية ونشرح دايرة كل واحد لواحده
الدواير المختلفة :
  1.  دايرة كات
  2.  دايرة ساتور
  3.  دايرة نيل
  4.  دايرة بطل الرواية

قبل مانبدأ في شرح الفيلم في اربع صور مهمين جدا لازم تحفظوهم كويس لان دول اللي الشرح مبنى على اساسهم  :-

صور شرح فيلم Tenet











ودلوقتى جه وقت الشرح يلا بينا . هتكلم عن كل دايرة برسمة وكل رسمة مكتوب فيها مجموعة من الازمنة ركز فيهم علشان تبقي الصورة واضحة معاك 
نبدأ بالترتيب أولا دايرة كات ( الصورة رقم 1 ) :
- الزمن ( أ ) : كات قاعدة مع زوجها الشيطان في أمان الله في ڤيتنام وبيتصافوا وبعدين مشت غضبانة مع ابنها من المركب لانه قرر يذلها.

- الزمن ( ب ) : بعد ما وصلت علي الشط رجالة سايتور جالهم اتصال منه وقالهم هاتوا الواد فقالوله يا معالي الباشا وأمه كمان قالهم لا دي الخدامة بتاعته المهم الرجالة جابوا الواد وأمه وهم جايين المركب شافوا واحدة ست بتنط من المركب وكات افتكرت جوزها اللي بيتهمها بالخيانة هو كمان خاين ففضلت تكرهه طول الفيلم ولما كات طلعت علي المركب هي وابنها ملقوش حد خالص.

- الزمن ( ج ) عدت الايام عادي جدا وكات قابلت بطل الرواية وقالها انه عايز يقابل جوزها المهم انها بعد كذا لقاء قالتله ان الحل الوحيد انه يسرق لوحة وهي بتظن انها في مطار اوسلو.

- الزمن ( د ) : القصة بتستمر عادي وهي بتحاول تقتل جوزها وبيتعصب وبلا بلا من امور الازواج دي ملناش دعوة المهم ان الزمن ده ساتور ضربها بالنار برصاصة معكوسة .

- الزمن ( ه ) : دخلت كات مع بطل الرواية ونيل وعكسوا نفسهم ومشوا في الزمن العكسي لمدة اسبوع ورا تقريبا لحد ما وصلوا للمطار وعكسوا نفسهم تاني كل ده علشان كات تتعالج من الرصاصة ظنا منهم يعني ان لما كات تمشي في الزمن العكسي الاشعاع اللي في الرصاصة هيروح وقد حدث وبعد ما وصلوا للمطار دخلوا في الآلة اللي هناك تاني وعكسوا نفسهم علشان يرجعوا في الاتجاه الطبيعي للزمن هم التلاتة .

- الزمن ( و ) : مشينا شوية في الاتجاه الطبيعي لمدة يومين عقبال ما بطل الرواية يعمل مشوار في السريع ويرجع ولما رجع عرفنا بقي أن ساتور جمع ال 9 قطع وهيمشي بالراجع لحد ما هيوصل لأكتر يوم بيحبه وهيموت نفسه فيه علشان يفعل ( الحاجة المنيلة ) اللي المستقبليين الوحشيين عايزين يفعلوها .

- الزمن ( ز ) : كات فضلت ترجع ترجع ترجع لمدة اسبوعين لحد ما وصلت لقبل لقاءها بجوزها علي المركب في ڤيتنام وعكست نفسها للاتجاه الطبيعي .

- الزمن ( أ ) : وصلت كات للمركب تاني بعد ما كات بتاعة الماضي مشيت وقابلت ساتور المستقبلي اللي كان وصل للمركب بعد ما ساتور الماضي مشي وهنا كات المستقبلية بتقابل ساتور المستقبلي من غير ما هو يعرف لانه مفكرها ماتت وقالها أحببتي يا كات وقالتله أحببي يا ساتور ( سهوكة ) فساتور قال يلم شمل العيلة واتصل بالرجالة بتوعه اللي قالوله يا باشا ده الواد مع الجارية الحبشية بس فقالتله شوف الناس العبيطة يا حبيبي مش عارفين يفرقوا بيني وبين خدامة فمشكش وكملوا دهان واقي الشمس عادي .

- الزمن ( ب ) : الخطة كانت بتقتدي ان كات متقتلش المنيل علي عينه الا لما ياخدوا ال 9 قطع الاول بس هي مقدرتش تمسك نفسها وقتلته قبل ثواني من اتمام العملية ( شغل نسوان ) ونطت من المركب وهي بتنط كات بتاعة الماضي هي وابنها شافوا واحدة بتنط ومن هنا نعرف ان كات هي اللي كرهت كات في جوزها ( وحسبي الله ونعم الوكيل ) .

- الزمن ( ح ) : كات بتكمل حياتها عادي تماما وبترجع لابنها اللي مستنيها في المستقبل وبتعيش عادي.
ثانيا دايرة ساتور المختل ( الصورة التانية ):
- ساتور ماضيه كله مش مهم اوي .. المهم فيه بس انه لقي رسالة من المستقبل بتقول كابتن انا عايزك تلم القطع التسعة دول وخد فلوس كتير اوي اهيه

- الزمن ( أ ) : ساتور قاعد مع كات بعد ما اكتشف انها بتخونه وماسك عليها ذلة ومعرفوش يتصالحوا فمشت وهو كمان ركب الطيارة ومشي راح الزمن ( أ داش ) لدار الاوبرا حيث العملية المنتظرة.

- الزمن ( ب ) : حياة ساتور بتمشي عادي جدا في اتجاه واحد بيقابل بطل الرواية وبيضرب مراته و و و المهم ان الزمن ب ده هو الزمن اللي بطل الرواية بيعترف ان القطعة الاخيرة في المكان كذا كذا بعد ما شاف ساتور معكوس بيضرب كات برصاصة معكوسة بالنار بس الحقيقة ان ساتور قاعد بيتفرج علي الحوار ده كله علشان يعرف ايه اللي حصل في الماضي ويرجع يعمله بنفسه وفجأة فريق TENET بيهجم

 فساتور بيدخل الآلة ويعكس نفسه وبيقول لفريقه هنعمل كل حاجة زي ما حصلت بالظبط بما انهم راجعين بالراجع بعد ما عرفوا ايه اللي حصل وهنا ساتور بينفذ المطاردة بحذافيرها هو في اتجاه الماضي والمطاردة مقابلاه في اتجاه المستقبل وبما انه عارف ايه اللي هيحصل عرف مكان القطعة بسبب غباء بطل الرواية.


الزمن ( أ ) : بعد ما اخد القطعة فضل يمشي بالراجع لحد قبل اسعد لحظات حياته في قعدة الصفا اللي انتهت ان كات اتخنقت منه ( متفهمش ازاي دي كانت اسعد اللحظات دا الراجل كان بيساومها ما بين الحرية وبين ابنها يلا عالم مجانين ) وهوب عكس نفسه للاتجاه الطبيعي تاني وراح المركب.

الزمن ( أ داش ) : حيث يظن ان القنبلة هتنفجر والدنيا هتبقي حلاوة وهيموت نفسه مرتاح بس الخطة بتفشل بسبب كات المستقبلية كما وضحت من قبل ودي كانت نهاية ساتور المستقبلي مع العلم انه في الحاضر لسه عايش ومستني عملية الاوبرا تنجح.
ثالثا دايرة نيل ( الصورة الثالثة )

- الزمن ( أ ) : نيل جاي من المستقبل بعد لقاء مع بطل الرواية المستقبلي دخل الآلة وعكس نفسه وفضل يرجع يرجع يرجع يرجع لحد ما وصل للزمن (ب).

- الزمن ( ب ) : نيل لسه بيرجع في الاتجاه العكسي وبينقذ بطل الرواية للمرة الاولي في دار الاوبرا الاوكرانية.

- الزمن ( ج ) : نيل بعد ما انقذ البطل عكس نفسه ومشي في الاتجاه العادي بتاع البشر علشان يقابل بطل الرواية للمرة الاولي بالنسبة لبطل الرواية في مومباي وينفذوا العملية علشان يعرفوا معلومات من بريا.

- الزمن ( د ) : بعد لقاء كات ببطل الرواية بيتفق هو نيل انهم يروحوا المطار وبالفعل بيعملوا العملية سوا وبيقابلوا شخصين واحد معكوس وواحد سليم نيل بيطارد السليم وبيسيبه بعد ما بيعرف هو مين طبعا هنعرف بعد شوية ان هو بطل الرواية.

- الزمن ( ه ) : بيخطط نيل وبطل الرواية انهم يسرقوا المعدن او القطعة 9 وبيسرقوها فعلا بس بيقابلوا ساتور المعكوس اللي بيسرقها منهم بعد ما بيضرب كات برصاصة معكوسة.

- الزمن ( د ) : علشان يعالجوها بيقرر التلاتة يمشوا في الاتجاه العكسي لحد يوم المطار وهنا السؤال ليه مفضلوش في مكانهم السبع ايام دول ويرجعوا يعكسوا نفسهم بالآلة اقولك حضرتك الآلة دي من سبع ايام كانت تحت سيطرة ساتور فلازم يدوروا علي آلة تانية وهم ميعرفوش غير آلة واحدة في المطار فراحوا في نفس وقت العكلية لان دي الفرصة الوحيدة حاجة كمان نيل اصلا متأكد ان بطل الرواية هيرجع لانه شافه هناك في المرة الاولي فاتأكد من انهم هينجحوا علي الاقل جزئيا وبالفعل دخلوا التلاتة من الالة وعكسوا نفسهم للطبيعي تاني.

- الزمن ( و ) : كات فضلت مع نيل يومين تتعالج صح بقي لحد ما بطل الرواية يقابل بريا ويقولها انت السبب في ان سانور ياخد مني الحاجة وامنعينيىكمان يومين من اني اقابله قالتله لا هو ده الصح تمه ياخد ال 9 قطع علشان ناخدهم كلهم مرة واحدة بعد كده بيكتشفوا ان الوقت اللي ساتور هيرجع ليه هو أسعد لحظات حياته من اسبوعين في نفس الوقت اللي حصل فيه انفجار كبير في القطاع 12 في أوكرانيا وهو ده مكان العملية وبدأوا في وضع الخطة !!

( شرح الخطة )

فريقين فريق هيفضل يرجع يرجع يرجع لحد وقت الانفجار بالظبط ويعمل تمويه كبير ضد رجالة ساتور ويفضلوا يمشوا في الاتجاه العكسي لحد قبل العملية ب 10 دقايق ويبلغوا اللي شافوه للفريق التاني اللي هيرجع معانا آه بس هيبقي بعيد عن ارض المعركة واول ما الفريق الازرق ده ينتهي هم يبدأوا وبكده هنربك رجالة سانور وهتبقي معجنا سعاتك المعجنة دي معمولة بغرض واحد بس هو التمويه
في نفس الوقت قائد العملية ايفز وبطل الرواية هيمشوا في الاتجاه الاحمر الاتجاه السليم علشان ياخدوا التسع قطع.

- الزمن ( ز ) : نيل مع الفريق الازرق وراجع من زمن التفجير لقبل زمن التفجير ب 10 دقايق وفجأة وهو راجع شاف الدراع اليمين بتاع ساتور بيحط قنبلة علشان يقفل المخرج علي البطل وايفز فعكس نفسه وبقي ماشي في الاتجاه الطبيعي باستخام آلة موجودة في المكان وبقي ماشي حاليا في نفس المسار الزمني لبطل الرواية.

- الزمن ( ب ) : رجعنا تاني للزمن ب اللي هو زمن الانفجار وزمن دار الاوبرا ونيل قبل الانفجار بثواني بيرمي حبل ينقذ البطل بعد الانقاذ بنكتشف ان ايفز بيقول لنيل كان فيه قفل وانت الوحيد اللي تقدر تفكه تحت فنيل بيودع بطل الرواية وبيقوله سلام وبيروح يعكس نفسه عكس الزمن الطبيعي تاني علشان يفتح القفل اللي تحت وبيموت فداءا لبطل الرواية.
رابعا دائرة بطل الرواية ( الصورة الرابعة )

- الزمن ( أ ) : البطل بينفذ عملية وبنفهم منها انه انسان محترم سواء لانقاذه المدنيين او انه مقلش اي حاجة عن زملاءه في العكلية دي بيشوف البطل القطعة ال 9 واللي اتاخدت علشان تتباع في السوق السودة وبيقابل شخص مقنع طبعا كلنا عارفين انه هو نيل اللي بعته بطل للرواية من المستقبل اصلا علشان ينقذه في الزمن ده بالراجع.

- الزمن ( ب ): بيعرف البطل عن منظمة اسمها TENET وبيبدأ يحقق وبيوصل لمومباي مع نيل اللي قابله للمرة الاولي بعد ما المنظمة عرفتهم علي بعض.

- الزمن ( ج ) : بعد طبعا ما قابل نيل توالت الاحداث سابقة الذكر لحد ما وصلنا للمطار حيث قابل بطل الرواية شخص معكوس عارف كل تحركاته بالظبط وبيعمل عكسها وفجأة الراجل المعكوس بيدخل في آلة ما.

- الزمن ( د ) : وصلنا للمطاردة واللي فبها بيقابل البطل ساتور بالمعكوس وبيخطفوه وبيحطوه في اوضة زرقا الناحية التانية ساتور بالمعكوس بيضرب كات بالنار وبعد ما اعترف بطل الرواية فين القطعة ال9 بيطلع سانور من مخبأه وبيقول للرجالة ننفذ كل حاجة زي ما حصلت بالظبط وبيركب الالة زي ما قلنا وبيروح يعمل نفس الخطوات بالظبط مع كات اللي كانت لسه مضروبة بالنار وفجأة بقت سليمة لان الرصاصة رجعت منها تاني وكأن شيئا لم يكن.

- الزمن ( ه ) : بطل الرواية قرر يمشي ورا سيتو بالراجع زيه ويحاول ياخد هو القطعة رغم ان ده مستحيل بس راح والعربية اتقلبت بيه وساتور حرقه او جمده ايهما تفضل.

- الزمن ( ج ) : بيمشي نيل وكات والبطل بالمعكوس لزمن المطار علشان يعالجوا كات وهنا بنكتشف ان الراجل اللي بالقناع هو نفسه البطل وبيحارب نفسه تاني وبيدخل يعكس نفسه فبيقابل الناحية التانيو نيل اللي بيجري وراه وبيكتشف انه هو البطل وجاي بالراجع من المستقبل فبيسيبه وهنا نكتشف ان نيل كان عارف ان ده هيحصل وبيدخل نيل وكات اللي بالراجع يعكسوا نفسهم هم كمان.

- الزمن ( و ) : بيروح البطل يقابل بريا ويعرف منها كل حاجة قبل لقاؤه القديم بيها بيومين وبردو صممت انها في المستقبل تقنعه بكل حاجة مقابل انها ترحم كات في المستقبل ومتقتلهاش.

- الزمن ( ز ) : تنفيذا للعملية بيفضل يرجع البطل في المركب الحربية بالمعكوس لحد ما نوصل قبل التفجير ب 10 دقايق وبيعكس نفسه وينضم للفريق لايفز علشان يجيبوا ال 9 قطع وبيتحبسوا تحت الارض بس بيقابلهم شخص مقتول فجأة بيتعكس بيه الزمن يفتح القفل وياكل رصاصة وبنكتشف انه هو نيل اساسا وبيهزموا راجل ساتور وياوا ال 9 قطع ويطلعوا بمساعدة نيل اللي في الوقت ده كان لسه عايش بعد ما عكس نفسه.

- الزمن ( أ ) : نيل بيقابل البطل لآخر مرة في أجمل مشهد في الفيلم وبيقوله ده الوداع بالنسبة ليا بس انت لسه هتقابلني دليل علي انه هو اللي هيبعته بالراجع من المستقبل.

- الزمن ( ح ) : بيمشي البطل في الاتجاه الطبيعي الاسبوعين تلاتة دول لحد ما يرجع للزمن الطبيعي وبيقتل بريا اللي خانت العهد وكانت راحة تقتل كات.

- الزمن ( ط ) : ده مجاش في الفيلم بس البطل هيدور علي نيل ويتعرفوا علي بعض ويصاحبه ويجنده ويرجعه بالمعكوس لحد زمن دار الاوبرا ينقذه .


وبس كده ياسيدى ده كان شرفح فيلم Tenet . انا عارف انه شرح طويل جدا ولكنه مميز وفريد 
ملحوظة الشرح منقول من محمد جمال احد اعضاء جروب سكرين ميكس بشكره جدا على مجهوده العظيم 
google-playkhamsatmostaqltradent