انا مكنتش حابة اشوفه بسبب الجدال و الظيطة اللي حواليه حتى اني نزلته 3 مرات و كل مرة تحصل مشكلة و انزله تاني
و كنت خايفة جداً يطلع ميستحقش أو يقفلني
بس الحقيقة هو من الأفلام القليلة اللي بتركبك آلة زمن توديك مكان تاني لمدة ساعتين و ترجعك
الموسيقى العبقرية اللي في الفيلم مش هتديلك فرصة ترجع للواقع قبل ما الفيلم يخلص
ممكن تختلف على انه حلو بس مستحيل تختلف على انه "مختلف"
مش كل يوم هوليوود بتنتج فيلم بيجمع بين كلاسيكية الستينات مع تكنولوجيا الألفينات.. دي حاجة مبهرة مبدأياً
أنا مش مستغربة من الناس اللي شافته ممل لأنهم ممكن ميكونوش من محبي الأفلام الموسيقية
بس متقدرش تقول انه تافه و ملهوش قصة ولا فيه رسالة
القصة بسيطة و جميلة و فيها رسالة مباشرة مش معقدة متقدمة بإخراج عبقري بحيث إنك لو كرهت الفيلم في أوله أو كنت ملان.. "المشهد الأخير" هينسيك كل ده و يخرجك حابب الفيلم
المشهد الأخير بالنسبة للفيلم بيمثل الأفلام بالنسبة للواقع
"لو" الأحداث مشيت بشكل معين أكيد النهاية هتكون مختلفة، هنحقق كل اللي احنا عايزينه و نبقى سعداء "Happy Ever After"
بس الواقع " واللي هو الرسالة اللي في الفيلم"
إنك تقدر تحلم باللي إنت عايزة، بس مستحيل هتحقق كل الأحلام
لو فاكر إن تحقيق حلم معين هيخليك أسعد إنسان في الكون، تبقى غلطان لأن دايماً هتكون في حاجة نقصاك !
حتى لو قدرت ترجع بالزمن و تغير الأحداث علشان تحقق حلم ضاع منك، لازم تدفع قصاده حلم تاني.
الحياة المثالية و السعادة المطلقة ممكن نحلم بيها بس مش ممكن نعيشها
بتصنيفه فيلم كلاسيكي/موسيقي ميقلش عن 9/10
إيما ستون كنت مستغربة من حصولها على الأوسكار عن الدور ده بس "تستحق" لأن آدائها أضاف قوة للقصة
برشحه للناس اللي لسة مشفتهوش إعتبر نفسك في رحلة تفصل بيها عن المعتاد و تطلع منها برسالة
يمكن... يمكن تنفعك في حياتك