مش عايز أهاجم وأقلل من قيمة الفيلم اللي الكل منتظره وعمالين نتفرج عليه.. بس هو فعلاً أقل بكتير من المستوى ...
يمكن بالنسبة ليا أنا عشان اتفرجت عليه بعد فيلم تاني أقوى منه مليون مرة
بالصدفة كان عندي فيلم عن فان جوخ اسمه " Vincent and Theo " .. إنتاج 1990
اتفرجت عليه
بعدها بربع ساعة لقيت كل الناس بتتفرج على فيلم " Loving Vincent " .. إنتاج 2017.. قمت اتفرجت عليه كمان
يعني اتفرجت عليهم ورا بعض في 4 ساعات متتالية بتنقل من الأول للتاني
فاتصدمت بكل صراحة من فرق المحتوى !!
في 1990 عملوا الفيلم عن قصة الفنان ومعاناته هو وأقرب الناس له ومحاولته إنه يوصل بفنه لمستوى قوي وإنه يحافظ على فنه ولوحاته ويقدم جديد رغم صعوبة كل الظروف اللي حواليه واللي بتدمره .. وبتجيب الفنان وهو بيرسم وتعامله مع الأدوات واللوحات والدراسة والأفكار وكل ما يتعلق بكونه فنان اتكون ازاي .. أنا كرسام قاعد بتفرج على الفيلم مستمتع وعايش كل لحظة بتفرج عليها وفاهمها وحاسس بيها جداً لأن ده مجالي وحاسس كأن اللي عملوا الفيلم فنانين من نفس المجال ومؤمنين بكل لقطة فيه.. جميل جداً وده عمل عظيم
تيجي في سنة 2017 عايز تعمل فيلم عن نفس الفنان رسام عظيم مشهور جداً.. بفكرة جديدة وهي إن الفيلم يكون عبارة عن 65 ألف لوحة ... " 65000 لوحة زيت " مرسومين بنفس أسلوب الفنان وبيتحركوا في تتابع لمدة ساعة ونص .. عشان في الآخر تموتلي الفنان في أول 20 دقيقة من الفيلم !!! وتحكيلي باقي الفيلم قضية عنه وأبطالها ناس تانيين !!
وتقوللي أنا بحكي قصة انتحاره أو موته وبدور على القضية ! انت عبيط بكل صراحة
يعني ضيعت مجهودك على الفاضي... انت لو كنت أول واحد يعمل عنه فيلم ماشي.. لكن انت قبلك ناس كتير سبقوك بمجهود أقل لكن نجحوا.. يبقى لازم تنافس.. الفكرة مش ماشية أبداً مع قضية الفيلم..
الموضوع مش راكب على بعضه خالص
ساعة ونص بتفرج على الفنان اللي بحبه ومبسووووط جداً بالمجهود اللي اتعمل في اللوحات اللي بتتحرك في كل ثانية من الفيلم والألوان والبهجة والأسلوب اللي بحبه.. وفي الآخر مش لاقي الفنان نفسه صاحب القصة والبطولة كلها !
بصراحة انت حرقت الفكرة تماماً
120 فنان من بلد مختلف ومعذبهم يعملوا 65 ألف لوحة وكل ثانية في الفيلم في حوالي 11 لوحة بستمتع بيهم يبقى مفروض تبهجني بالموضوع كمان وأركز وانا مبسوط مش وانا بفكر ... لو كانت اتعملت لقصة حياته والاهتمام بيه اكتر وأشوف لقطات اكتر للفنان وهو بيرسم وعايش وعلاقاته بالناس وحياته اليومية اللي تهم الفنان اللي من نفس مجاله كنت نجحت أكتر
فيه اختلاف في الأحداث في حياة الفنان بين الفيلمين وكل واحد له وجهة نظر مختلفة
بس أنا لما اتفرجت على الفيلمين ورا بعض فعلاً محستش بأي قيمة للفيلم الجديد غير إنك برافو فرجتني على لوحات كتير جديدة بنفس أسلوب فان جوخ لكن مش محطوطة في مكانها أبداً وقيمتها تقترب للصفر دلوقتي !
أنا فعلاً مش هتفرج على الفيلم تاني بقدر ما هتفرج على الفيلم الأول اللي مهتم بالتفاصيل اللي أي رسام هيفرح بيها ويستناها في كل لقطة !
فيلم " A girl with pearl earring "
بيحكي عن قصة لوحة والرسام صاحبها وبرغم كده من أفضل الأفلام اللي بينت تفاصيل الحياة الخاصة والعملية للفنان في مرسمه وفي كل علاقاته.. أنا بتفرج على الفيلم وببتسم كده وبضحك تلقائي كل ما تيجي لقطات للألوان وأدوات الرسم واللوحات وموضوعات تخص الفنان
فيلم " Big Eyes "
كان بيناقش قضية برضه بس طول الفيلم مبين الفنانة وهي بترسم وتفاصيل لوحاتها ورسمها وألوانها وحياتها والموضوع متكامل
" Mr. Turner "
من أول الفيلم لآخره مهتم بحياة الفنان بين لوحاته وبين حياته الخاصة.. ومتفاعل جداً مع كل لحظة في الفيلم برغم إني كان نفسي أشوف الفنان وهو بيرسم وفي مرسمه أكتر.. بس الفيلم فضل مركز مع الفنان طول الوقت وده مهم..
" Goya's Ghosts "
يمكن مكانش مهتم أوي بالرسم نفسه.. لكن طول الوقت مركز مع الفنان وحياته والمواقف الدرامية اللي عايش فيها ومن البداية الفيلم ربطني بباقي الأشخاص دول من خلال الرسم برضه مش مجرد علاقات اجتماعية..
وطبعا معاهم فيلم Vincent and Theo اللي اتكلمنا عنه
مجرد دردشة لأني فعلاً بحب المجال ده وبهتم بأي عمل فني يتقدم فيه
الصور لقطات من الفيلم الأول سنة 1990 وتبين فعلاً طبيعة وشخصية فان جوخ
ولقطات من الفيلم الجديد 2017 تبين قضية حول الفنان لكن بأسلوب لوحاته الجميل
