مستلزمات المجند في مركز التدريب - اخد ايه معايا وانا رايح مركز التدريب

صباح او مساء الخير حسب الوقت اللي بتقرأ فيه الموضوع ، في موضوع النهاردة هتكلم عن اكتر سؤال بيتكرر اثناء تجهيز اوراق تأدية الخدمة العسكرية . حتى انا شخصيا سألته لكل صحابي اللي دخلوا جيش وهو اخد ايه معايا وانا رايح مركز التدريب
وده لان مركز التدريب او فترة التأهيل هي اصعب واطول فترة في الحياة العسكرية لان هي اللي بتنقلك من مدنى الى عسكري وطبعا فترة التدريب دى بتبقي من 40 ل 45 يوم ممكن اكتر بحاجات بسيطة او اقل

يعنى في ناس بتقضي مركز تدريب اسبوعين وفي ناس بتقضي شهر وفي ناس بتقضي 45 يوم وفي ناس بتقضي 48 بس عمرها ماهتزيد عن 50 يوم الا في بعض الاسلحة زى المركبات اللي فترة التدريب فيه بتبقي 90 يوم او سلاح الداخلية .
المهم خلينا نتفق انك هتقضي هناك 45 يوم في أسوأ الظروف طيب تاخد ايه معاك في الفترة دى ؟ .
هتلاقي بوستات كتير عن مستلزمات ملهاش اى لازمة ومش هتستعملها بس من خلال خبرتى انا هقولك الخلاصة :
بس قبل الخلاصة لازم تعرف مين هما دفعة العبيد وليه كده . لو حابب تعرف : من هنا

مركز التدريب

مستلزمات مركز التدريب 

1. الفلوس : بالنسبة للفلوس فـ دى حسب كل واحد ومقدرته وحسب برده وضعه المادى قبل الجيش يعنى في ناس ممكن يقضيها 200 ج وفي ناس ممكن مايقضيهاش 2000 ج بس خلينا نقول كمتوسط لو انتا مدخن فهتحتاج حوالي 1500 وهيبقي جزء من أكلك من الميس ( الاكل الميري )  وجزء من الكانتين ( الكافتريا ) ولو انتا مش مدخن فهيكفيك من 600 ل 800 ج وممكن اقل من كده بكتير لو هتعتمد علاميس خلينا نقول ان الميزانية تبدأ من 400 الي ماشاء الله حسب قدرتك وبرده انتا تعود نفسك ماتصرفش كتير 
2. بالنسبة للملابس :- الملابس الداخلية خد مثلا 4 او 5 اطقم كده كده هتغسلهم ولو انتا في الشتا خد ٣ اطقم كلسون هناك وبالنسبة للملابس العادية خد تيشرتين وبنطلونين تنام فيهم ولو كان معاد دخولك في الشتاء ف شهر واحد يعنى خد معاك لبس تقيل مايهمكش هتخش بيه وكده كده انتا بتستلم ترننج لياقة ممكن تبقي تنام فيه 
3. ادوات النظافة : خد معاك 5 او 6 اكياس مسحوق غسيل صغير عشان تبقي تغسل بيه هدومك + 4 صابونات وصبانة عشان تحط فيها الصابوونة + شامبو للاستحمام والشعر ويفضل لو كان أكياس علشان محدش يرخم عليك + ليفة  وطبعا فوم او معجون عشان الحلاقة ومكن حلاقة ايا كان النووع اللي انتا بتستعمله وحسب دقنك بس الافضل علشان محدش يرخم عليك هات 3 اكياس مكن حلاقة اللي هوا الكيس فيه خمس مكنات ده البرتقالي او الاسود او مكن جيلات مش هتفرق اللي انتا عاوزه خده المهم ماتاخدش معاك مكنة كهربا او مواس حلاقة وماتنساش مرطب للوش وبودرة رجل للبيادة و ورنيش 
4. خد معاك 3 اقفال كومبيوتر واحد للمخلة وواحد لدولابك وواحد لشنطتك والفلوس اللى انتا واخدها معاك ماتفارقكش ( نام بيهم ) اوعى تسيبهم في المخلة او في الدولاب او في الشنطة هترجع مش هتلاقيهم .
5. خد معاك باكتتين مناديل جيب يعنى 20 باكو مناديل علشان سواء كنت داخل فى الصيف او في الشتا هتحتاجهم علشان الحر والبرد والعرق وكده وهات مناديل وايبس اكياس صغيرة عشان تحطها في جيبك وتستخدمها لان بعد التدريب هيقولك روح الميس او روح كل علطول ومش هيبقي فيه اماكن تغسل فيها ايدك 
6. اهم حاجة خد معاك فرش للبيادة اشتري 3 اجواز احتياطى علشان هيتفرتك منك هناك من التدريب وكده حابب تشتري فرش طبي براحتك حابب تشتري العادى براحتك برده  وخد معاك فوطة نضيفة وتلات او اربع شرابات نضاف لان الشرابات الميري بتتقطع بسرعة 
7. ابرة وخيط علشان تخيط الهدوم لما تتقطع وقصافة ( من غير اسلحة ) وخد معاك نوتة صغيرة وقلم علشان تسجل ارقام زمايلك وحاول تخبيها ماتخليش حد يشوفها علشان مايبضنش عليك ويقولك بتكتب اسرار عسكرية وبتاع . وخد معاك كشاف صغير ابو 5 ج اللعبة ده وساعة رقمية تكون بتنور اهم حاجة .
8. سجادة صلاة ومصحف صغير  
9. ادوية : دوا للبرد +مضاد حيوى + مسكن + مطهر معوى + دوا للامساك (  ممكن تقعد اسبوع ماتدخلش الحمام ماتقلقش ده طبيعى ) 
10. كــــــــشــــــــــــــــاف + ساعة بتنور 
11. معلقتين صغيرين ومعلقتين كبار 
12. ماتاخدش معاك موبايل ماتاخدش معاك موبايل ماتاخدش معاك موبايل . خد مع شريحة وتكون مشحونة او عليها باقة وصرف نفسك هناك من اي حد وعموما هناك في سنترال الدقيقة بربع لنفس الشبكة اللي بتكلمها ولو شبكة مختلفة بجنيه ونص طبعا التسعيرة بتختلف من مكان لمكا
13. سبراي off عشان الناموس وبخاخة دينول عشان ترش بيها سريرك ودولابك 

دي كل الحاجات اللي المفروض تاخدها في مركز التدريب واللي تعتبر مستلزمات حياتك اليومية مابتزودش كتير يعنى
المهم فترة التدريب تعتبر اصعب فترة في الجيش لان زى ماقولت هي النقلة من المدنية للعسكرية يعنى ممكن ترقد وتزحف وتتهان كتير . اهم حاجة ماتاخدش الامور على صدرك وتضايق نفسك وحاول دايما تعدى يومك بهزار وصدقنى احلي صحبة في الجيش كله هي صحبة مركز التدريب وعلى فكرة هوا اول اسبوع بيبقي صعب بعد كده انتا بتكون اتعودت عالروتين وفهمت الدنيا

 واكتر كلمة هتقولها ( ولا يوم من ايام مركز التدريب ) لان مركز التدريب هوا الفترة اللي بتدرب فيها من غير ماتشيل مسؤولية بعكس لما تروح قوتك الاساسية خلاص بقا بتبقي مسؤول وبتأدى واجبك وخليك فاكر ايا كان جيشك سواء سنة او سنتين او تلاتةف كده كده دى مش حياتك ... دى فترة بتقضيها فحاول قدر الامكان تقضيها من غير خساير واكسب اللى قدامك سواء عسكري او ظابط او صف ظابط اتعر عالناس وحبهم واحلي صحبة فعلا هي صحبة الجيش بالتوفيق للجميع اللي عنده اى استفسار في الكومنتات انا تحت امركم 

الكلمات المفتاحية : مستلزمات مركز التدريب,مستلزمات مركز التدريب الجيش,مستلزمات مركز التدريب في الجيش اخد ايه معايا وانا رايح مركز التدريب , مستلزمات الجيش , اخد ايه معايا وانا رايح الجيش , مستلزمات المجند في مركز التدريب , مستلزمات مركز التدريب,مستلزمات مركز التدريب الجيش,مستلزمات مركز التدريب في الجيش , احتياجات الجندى في مركز التدريب , اخد معايا ايه في مركز تدريب

تعديل المقال