الحرب العالمية الثالثة 2020
النهارده السوشيال ميديا كلها بتتكلم عن إن فيه حرب عالمية تالتة، ولكن معظمنا مش فاهم إيه اللي حصل أصلًا، ولا إيه اللي بيحصل، وقاعدين كده عاملين زي اللي غرقانين في شبر مَيه.. طيب خليني احاول اشرح الموضوع ببساطة شديدة على حد فهمي..
بداية كلامي هتخلينا نروح لشخص مهم جدًا لازم نعرفه لأنه فتيل الحرب، الراجل اللي في الصورة ده، اللي يعتبر سبب كل اللي بيحصل.. (قاسم سليماني)..
قاسم سليماني قائد عسكري في إيران، إن لم يعد الأهم في إيران، ملقب برأس الحربة، وقائد لفيلق القدس، التابعة للحرس الثوري الإيراني، ودي جهة مسؤلة عن العمليات العسكرية والعمليات السرية خارج إيران..
وهو برضه من المحاربين القدماء في الحرب العراقية الإيرانية..
الراجل ده له مواقف كتيرة جدًا، كان نشط في صراعات كتيرة في الشرق الأوسط، خصوصًا في العراق والشام، وكان بيساعد عسكريًا، وقدم من فترة مساعدات عسكرية للشيعة والجماعات الكردية اللي كانت مناهضة لصدام في العراق، وحزب الله في لبنان، وحماس في فلسطين، وساعد في دعم الحكومة السورية خلال الحروب الأهلية، وساعد في قيادة القوات الحكومة العراقية والحشد الشعبي ضد داعش، وغيره كتير..
المهم إنه في النهاية اتصنف من قبل أمريكا بإنه داعم للإرهاب، وأكد على ده وزير الخارجية السعودي بأنه مدرج على لائحة الإرهاب .. زي بن لادن كده بالظبط، وده لأن الراجل ده قنبلة موقوتة، وتصرفاته تقلق وترعب، فاتحط في القايمة السودة عند أمريكا تحسبًا لأي شيء، وخصوصًا لأنه قائد لفيلق القدس والحرس الثوري الإيراني اللي عاملهم مشكلة في العراق، وكعادة أمريكا أي عيار بيدوشهم بيحاولوا يتخلصوا منه..
والغريب إن أمريكا لحد دلوقتي لسه محتلة أماكن في العراق تحت مسميات وشعائر غريبة، بل وأحيانًا بترتكب جرائم ولكن فيه تستر إعلامي رهيب.
الحكاية بدأت من هنا:
النهارده الصبح حصلت الفاجعة، الجمعة 3/يناير/2020، تم قذف 3 صواريخ قرب مطار بغداد، بجانب موقع مشترك بين القوات الأمريكية وقوات مكافحة الإرهاب، اتقتل فيها قاسم السليماني بعد إصابة صاروخ لسيارته، واتقتل نائب رئيس ميليشيات الحشد الشعبي في العراق أبو مهدي المهندس، وخمس أعضاء آخرين..
بعد ما اتأكد الخبر خرجت أمريكا وصرحت: "بناء على تعليمات الرئيس الأمريكي تم قتل قاسم السليماني قائد قوة الحرس الثوري الإيراني، وهي منظمة إرهابية أجنبيه مدرجة من قبل الولايات المتحدة، وذلك كإجراء دفاعي حاسم لحماية الموظفين الأمريكيين بالخارج" محملين فيلق القدس المسؤلية عن مقتل مئات من القوات الأمريكية، وقوات التحالف.. وده لأن كان حصل كذا ضربة على العسكريين الأمريكيين من قبل وحملها ترامب على إيران، اللي كانت بتنفي إنهم لهم يد في الموضوع.
وكمل البيت الأبيض التصريح وقال: "إن سبب وجود قاسم السليماني في العراق هو إنه كان بيخطط لمهاجمة الدبلوماسيين الأمريكيين والجيش الأمريكي بالعراق".
وخرج ترامب وقال: "إن الشعب العراقي بيرفض سيطرة إيران عليه" وده لإن إيران في الفترة الأخيرة كانت بدأت تسيطر على بعض القادات العراقية وبتمسك زمام الأمور.
وكمل ترامب بتغريدة على تويتر وقال: "دفعت الولايات المتحدة للعراق المليارات من الدولارات لسنوات عديدة، غير كل شيء قد قمنا به من أجلهم، ولا يريد شعب العراق أن تسيطر عليه إيران وتتحكم به.. وقد كسبت إيران على مدار السنين الأخيرة المزيد والمزيد من السيطرة على العراق، وهذا لن ينتهي بشكل جيد أبدًا." وكأنه تهديد واضح وصريح صد إيران.
هنا أعلنت طهران إنها هترد رد قاسي جدًا والأمر مش هينتهي على خير..
فبررت أمريكا إن قبل ضرب سليماني بيوم تم شن ضربة من جماعة عراقية مدعومة من إيران على السفارة الأمريكية، وهذا يعد ردًا على ما فعلوه..طبعًا كل اللي سبق ده مبيظهرش أي خير نهائي، إن ممكن في أقرب وقت يحصل حرب بين أمريكا وإيران !!
بعد موت سليماني طلع بيانات كتير من بعض الدول، والغريب في الأمر هو تصدر هاشتاج على تويتر بيخص حرب عالمية تالتة وصل لنص مليون بين مؤيد ومعارض..
طيب يا جماعة إيران عندها نووي؟؟ هي بتقول إن عندها نووي وفيه أخبار بتقول إنها لسه في مرحلة التخصيب، ولكن مفيش اللي يثبت إن عندها نووي، ولكن الجدير بالذكر إنها دولة قوية جدًا على فكرة..أمريكا عندها نووي؟؟ أه عندها نووي وتُعد أقوى دولة في العالم..
يعني في الحالة دي لو حصلت حرب نووية تخيل معايا بقى الشكل الجديد اللي هيحصل للكرة الأرضية، يعني من الآخر جهزوا نفسكم للمسيح الدجال من دلوقتي
أما بقى لو كانت حرب جوية وأرضية وغيره، العراق هي اللي هتكون الملتقى بين الاتنين، هتكون ساحة للحرب، وبكده الضرر هيكون على العرب..
طيب ليه الناس كلها بتقول إن هيكون فيه حرب عالمية تالتة، ده حصل بعد انعقاد اجتماع بين القادة في إيران بعد مقتل سليماني ملئ بالتهديد والوعيد إن هيكون فيه حرب والرد هيكون رادع وقوي على أمريكا.
طيب هل ده قرار بالحرب؟؟
من رأيي التهديد والوعيد وغيره حصل كتير على مر العصور ومكنش له أثر، الفعل اللي له أثر، وأهو خلينا قاعدين مستنيين لما نشوف هل هيكون فيه حرب ولا لا، وتكون دي آخر حرب عالمية تحول شكل الكرة الأرضية وبعدها تقوم القيامة!
طيب إيه علاقة مصر وتركيا بالموضوع؟؟
هنا هنروح لجهة تانية، وبلد تانية، وموضوع تاني خالص اللي أساسه ليبيا، اللي هتكون سبب في حرب وشيكة بين تركيا ومصر..
فيه حكومة شرعية في ليبيا اسمها حكومة وفاق ودي معترف بيها دوليًا، بيقابلها معارضة مسلحة بقيادة حفتر بتأييد من مصر.. تركيا هددت إنها هتتدخل عسكريًا لمساعدة حكومة وفاق، ومصر اعترضت خصوصًا إن تدخل تركيا لليبيا اللي هما على حدودنا ممكن يؤدي لتدخل تركيا مصر اللي بتؤيد أصلًا حفتر، ودخول تركيا معناه اعتراضهم على تأييد مصر لحفتر، فبالتالي مصر توعدت بالرد الحاسم، وبكده هتكون حرب بينا وبينهم.
وطبعًا لو أمريكا دخلت حرب حلفائها كتير، زي دول أوروبية، والكيان الصهيوني.. وأعدائها كوريا الشمالية وروسيا.
إيران حلفائها روسيا وحزب الله وأعدائها بعض دول الخليج وتركيا مستنية منها غلطة.
مصر حلفائها دول الخليج وأمريكا وأعدائها قطر وتركيا والجماعات الإسلامية واللي مستنيها تقع كتير.
تركيا حلفائها قطر وبعض الدول الأوربية وروسيا والصين وأعدائها دول الخليج ومصر وإيران وسوريا.
كمان مؤخرًا حصل حاجة تزود القلق، وهي دخول أردوغان سوريا بحجة حفاظه على أمن وحدود تركيا!!
أما بقى لو أمريكا حاربت إيران هيكون مكان التلاقي في العراق، وبكده شعب العراق هيعاني أكبر معاناة.
جميع حقوق الطبع والنشر محفوظة لصاحب المقال
الكلمات المفتاحية : الحرب العالمية الثالثة 2020 في الحرب العالمية الثالثة السعودية في الحرب العالمية الثالثة الدول المشاركة في الحرب العالمية الثالثة ماذا سيحدث في الحرب العالمية الثالثة الحرب العالمية الثالثة ويكيبيديا الحرب العالمية الثالثة ونهاية العالم مصر والحرب العالمية الثالثةايران والحرب العالمية الثالثةهاشتاق الحرب العالمية الثالثة هل الحرب العالمية الثالثة اقتربت هل الحرب العالمية الثالثة بدأت هل الحرب العالمية الثالثة قادمةحقيقية الحرب العالمية الثالثة - اسباب الحرب العالمية الثالثة - الحرب العالمية الثالثة 2020 - WW3