Cosplay
معنى كلمة كوسبلاي
صباح الخير ، في يوم من الايام في وقت من الاوقات في فترة من الفترات في سنة من السنين تحديدا اول امبارح كنت بمارس هوايتى المفضة كـ اوتاكو وبتفرج على صور لكوسبلاي من انمي هانتر واثناء مانا بتفرج جالي اشعار على الفيسبوك فقولت خير اللهم اجعله خير لقيت حد بيسأل في جروب احد الزملا عن معنى كلمة كوسبلاي والكوسبلاي ده عبارة عن ايه ؟ . فقولت في بالي كده ليه ياواد ياصاحب موقع سكرين ميكس ماتكتبش موضوع تعرف فيه الناس كل حاجة عن الكوسبلاي . وبس ياصاحبي انا جايلك النهاردة علشان نتكلم عن كل مايخص الكوسبلاي جاهز ؟ .. يلا بينا
 |
| معنى كلمة كوسبلاي |
معنى كلمة كوسبلاي Cosplay
الكوسبلاي ياصحبي هي كلمة مكونة من مقطعين COS ودى اختصار لكلمة Costume ومعناها راداء او زي و Play اختصار لكلمة Play Role ومعناها يلعب دورا ما او يؤدى دورا ما والمقصود بيها هو الاداء او لعب دور لشخصية ما وطبعا الشخص اللي بيعمل الكوسبلاي هو الشخص الاوتاكو اللي بيحب شخصية معينة في انمي فبيقلد الشخصية دى من ناحية كل حاجة كلامها ومشيتها ولبسها وشعرها وكل حاجة بمعنى ان كل اوتاكو بيكون له انمي مفضل وفي الانمي ده له شخصية مفضلة الكوسبلاي بقي انه يبقي هو الشخصية دى ويقلدها في كل تفاصيلها وهوضح ده بالصور دلوقتى
 |
| كوسبلاي شخصية كيلوا من انمى هانتر |
دي صورة لكوسبلاي شخصية كيلوا من انمي Hunter X Hunter زى ماواضح في الصورة عبارة عن شخص بيحب الشخصية فحاول يقلد الشخصية في لبسها وشعرها وكمان الادوات اللي بتستخدمها الشخصية ودلوقتى هعرضلكم صورة شخصية كيلوا اللي الشخص ده بيقلدها
 |
| شخصية كيلوا من انمى هانتر |
وده كان شخصية كيلوا اللي الشخص ده عمل الكوسبلاي بتاعها . اعتقد كده الامور بقت واضحة وعرفتم معنى كلمة كوسبلاي . طيب هل في ادوات معينة علشان تعمل كوسبلاي ؟ . اكيد طبعا في
الادوات اللازمة لعمل كوسبلاي
اول حاجة طبعا هي ملابس الشخصية ودى اما بتشتريها جاهزة من اى انمي ستور او بتفصلها عند اى ترزي
تانى حاجة وهي الويج ( الباروكة او الشعر ) ودى لازم تكون نفس قصة شعر الشخصية بالظبط علشان تبان انك كوسبلاي بروفيشنال
تالت حاجة وهي الميكب ودى بيستخدموها البنات اكتر يبينوا ملامح الشخصية
ايه فايدة الكوسبلاي ؟
علميا هو مالوش اي فايدة لان اكيد مافيش حد طبيعي هيعمل كوسبلاي وينزل يمشي بيه في الشارع ولكن الكوسبلاي بيتعمل في ايفنتات الانمى اللي بتكون عبارة عن تجمعات لاشخاص بيحبوا الانمي فالموضوع مابيبقاش ويرد وبيبقي حاجة حلوة انك تلاقي حد بيشاركك نفس اهتمامتك
هل الكوسبلاي مكلف ؟
اوقات كتير جدا بيكون الكوسبلاي مكلف خصوصا لو الشخصية فيها تفاصيل كتير وليها ادوات بتستخدمها زى السيوف والرماح وغيرهم . ساعتها بيكون الكوسبلاي مكلف وممكن يعدى الـ 2000 جنيه مصري يعنى حوالي 125 دولار وفي كوسبلاي ممكن يوصل لحد 1000 دولار .
وبس كده ياصاحبي ده كان كل حاجة بخصوص معنى كلمة كوسبلاي ومواصفاته وازاى تقدر تعمله لو الموضوع عجبك شيره مع صحابك و ماتنساش تاخد جولة سريعة في قسم المعانى هتلاقي مواضيع كتير تعجبك . يلا سلام .