القضاء على الناموس من المنزل بدون مبيد ورش
كيف اتخلص من الناموس في المنزل
علشان الوضع اصبح لايحتمل والواحد مابقاش عارف يقعد في بيته من الناموس وعلى الفور قمت بتصفح جميع المقالات التى تحتوى على طرق للقضاء على الناموس من المنزل بدون مبيد ورش وبعد ماجربت اغلب الطرق دى لمدة اسبوعين قررت اجيلك النهاردة بـ أفضل حل لطرد الناموس علشان تجيب من الاخر وماتضيعش وقت في تجربة طرق كتير جاهز ياصاحبي ؟ يلا بينا
 |
| طريقة للتخلص من الناموس |
كيفية التخلص من الناموس
بص ياصاحبي انا هبدأ بالطرق اللي جربتها وكانت نتيجتها مضمونة واكثر فاعلية والباقي برده كويسين ولكن هنبدأ من الاكثر فاعلية للأقل علشان تبقي عارف يعنى فـ ورقة وقلم ياست الكل واكتبي معايا
القضاء على الناموس بواسطة البصل والقرنفل
تقريبا دى كانت اكتر طريقة جربتها وجابت معايا نتيجة واستمرت لمدة خمس ايام بنفس الفاعلية وابتدت تقل بالتدريج . في الطريقة دى ياصاحبي هتجيب طبق او علبة و تجيب بصلة وشوية قرنفل بالنسبالي انا فكانت التجربة على 15 عود وتجيب مبشرة وتبشر البصلة في طبق وتحط عليها عيدان القرنفل وتحطها جنب المكان اللي هتقعد فيه . بصراحة ماقدرش احدد المدي بتاعها بالظبط كام متر
لكن الرائحة كانت منتشرة في الاوضة اللي قاعد فيها بس انا لما جيت انام عملت طبقين وحطيت واحد في اول السرير وواحد في اخر السرير اللي هو مش هسيبك تقربلي ايها الناموس اللعين الطبقين دول استخدمتهم لمدةة خمس ايام وكانت النتيجدة كويسة و الناموس ماكنش بيقرب خالص واللي كان بيقرب كنت بلاقيه مغمى عليه جنب الطبق
لدرجة كانوا بيصعبوا عليا بعد خمس ايام المفعول ابتدى يقل واضغطريت آسفا اجيب بصلة جديدة وابشرها واحط عليها اقرنفل خصوصا ان البصل غالي زى مانتوا عارفين الكيلو ونص بعشرة ههههه بهزر المهم يلا بينا نشوف باقي الطرق
كيفية القضاء على الناموس بواسطة الخل
تجربتى مع الخل كانت تجربة كويسة ومرضية بالنسبالي الي حد . في الطريقة دى هتجيب كوباية وتملا نصها خل بس ماتحطش اى حاجة عليه وتحطها جنبك في المكان اللي هتقعد ومافيش ناموسة هتجرأ تيجي جنبك لان رائحة الخل من الروائح المنفرة للناموس وللـ بنى آدمين والله عموما هو حل مضمون بس صعب شوية للناس اللي مابتحبش الخل واللي انا منهم بصراحة لان الرائحة بتكون نفاذة جدا
بالنسبة لخل التفاح فده ممكن تعمل منه مصيدة للناموس عن طريق انك تجيب ازازة وحط فيها قمع و الناموس بينجذب لرائحة حل التفاح فهيدخل الازازة مش هيطلع منها وددي كانت طرق القضاء على الناموس بواسطة الخل نيجى بقي للطريقة الجاية والاكثر انتشارا وهي الليمون
طرد الناموس من الغرفة بواسطة الليمون
الليمون من الفاكهة الحمضية اللي بيتميز بالرائحة النفاذة والطعم اللاذع ولو انت او مرة تعرف ان الليمون من الفواكه فمالوش لازمة تشكرنى ياصاحبي لان طبيعي اقولك معلومات زى دى خصوصا انى خريج كلية زراعة فمش هلاقي وقت افضل من ده علشان ازيط فيه واستعرض المعلومتين اللي طلعت بيهم من الكلية عموما نرجع لموضوعنا بالنسبة لليمون فـعندك تلاتة حاجات تستخدمهم للقضاء على الناموس
- الليمون بالقرنفل : في الطريقة دى هتجيب لمونة وتقطعها نصين وتحط اعواد القرنفل في كل نص وتوزعها حوالين المنطقة اللي انت قاعد فيها اما
- اوراق الليمون : هتجيب شوية مية وتحط فيها ورق لمون وتغليهم وتصبهم في كوباية وتحطها في المكان اللي انتا عاوز تطرد منه الناموس
- زيت الليمون : هتجيب زيت اللمون وتحطه في كوباية وتوزعه في الاماكن اللى عاوز تطرد منها الناموس وخلينى اكون صريح معاك انا ماجربتش الطرق دى كتير هو يومين تقريبا لكن كانت كويسة
التخلص من الناموس بالبخور
ودى تعتبر اكتر الطرق الشائعة اللي الناس بتستخدمها وخلينى اقولك رأيي بكل صراحة انها مش مجدية بنسة 100% وانا شايف انها خطر على الصحة وخطر على السلامة العامة لانك ماينفعش تولع عود او عودين بخور وتنام محدش ضامن ايه ممكن يحصل علشان كده انا مابفضلش الطريقة دى ومانصحش باستخدامها حفاظا على صحتك وعلى سلامتك وسلامة المكان
طرد الناموس نهائيا بواسطة الثوم
بالنسبة للطريقة دى انا خليتها في الاخر لاني ماحبتهاش هي اينعم فعالة جدا كمان بس ريحتها صعبة جدا جدا خصوصا للناس اللي عندهم حساسية من الثوم . في الطريقة دى ياصاحبي هتجيب كام فص توم وتطحنهم وتسلقهم في مية وتعبي المية دى في بخاخة وترش يامعلم هي مجدية بس صباح الريحة تخيش بيتك كله هيبقي ريحته توم
نباتات ذات روائح غير محببة للناموس
في شوية نباتات بتطلع روائح منفرة للناموس ولكن مش كلها فعال بنسبة 100% ولكن الواجب بيحتم عليا انى اقولك كل حاجة فلو حابب تجرب حاجة من النباتات دى جرب
- النعناع
- اللافندار
- الريحان
- زيت او اوراق الزعتر
- زيت القرفة
- زيت شجرة الشاي
- الثلج الجاف
- القهوة المطحونة
طرق اخري لطرد الناموس
- الناموسية
- مصيدة الخميرة
- اجهزة طرد الناموس اللي بتتباع في المحلات
- المبيدات الكيميائية المعروفة ( مابتجيبش نتيجة تحس ال الناموس خد مناعة منها )
نصائح لتجنب دخول الناموس المنزل
ماتفتحش الشبابيك ياصاحبي عمال علي بطال خصوصا بالليللو عندك اى فجوات او شقوق في الحيطة سدهاالنضافة ياصاحبي النضافة ثم النضافة ثم النضافة الحشرات بتكره النضافة
وبس كده ياصحبي ده كان حاجة بخصوص موضوع النهاردة أفضل حل لطرد الناموس من المنزل لو عجبك الموضوع وحاسس انك استفدت هكون سعيد جدا لو شيرته مع اصحابك على السوشيال ميديا يلا سلام . اة نسيت اقولك لو انت اول مرة تزور موقع سكرين ميكس فاسمحلي اقترح عليك بعض اقسام الموقع يمكن تلاقي حاجة تفيدك وتحب تشوفها