معنى كلمة سيكا ( معنى سيكا في الفيس بوك ) يعنى ايه سيكا

الصفحة الرئيسية
صباح الخير ، في يوم من الايام في وقت من الاوقات في فترة من الفترات في سنة من السنين تحديدا سنة 2020 كنت بتصفح التايم لاين على الفيسبوك زيي زي اى مواطن بيحب بلده ويهمه مصلحته فجأة لقيت بوست لواحد بيسأل في جروب عن معنى كلمة سيكا في الفيسبوك واستوقفنى الموضوع وقولت لازم افتح قسم المعانى في الموقع واكتبلكم موضوع عن معنى و اصل كلمة سيكا المنتشرة على الفيسبوك 


المهم ياصحبي علشان ماطولش عليك قبل ماقولك يعنى ايه سيكا حابب اقترح عليك تاخد جولة سريعة في قسم المعانى في الموقع ، هتلاقي معانى لكلمات كتيرة منتشرة على الفيسبوك زى نرم و لول و ظظظ و ري وغيرهم كتير المصطلحات اللي بقت منتشرة على السوشيال ميديا وبيتم تداولها يوميا في تعليقات الفيسبوك



ما معنى كلمة سيكا في الفيس بوك
معنى كلمة سيكا في السوشيال ميديا


معنى كلمة سيكا على الفيسبوك 


السيكا عبارة عن وحدة فياس بيتم استخدامها لقياس حاجات زى الزمن والكمية والمسافة يعنى لو هنستخدم كلمة سيكا كوحدة قياس للزمن زى مثلا لما اقولك ( سيكا وجايلك ياصاحبي مش هتأخر ) فالمقصود بيها هنا ( حبة صغيرة وجايلك ياصاحبي ) وممكن استعمالها كوحدة قياس للكمية زى مثلا لما اقولك (  الكلح حلو بس الملح كان زيادة سيكا ) يعنى الاكل حلو بس الملح كان زيادة شوية ولو هنستخدمها كوحدة قياس للمسافة زى مثلا لما اقولك ( المكان ده بعيد سيكا ) يعنى المكان ده بعيد شوية . فالمقصود بكلمة سيكا هنا هو ( شوية وحبة واى حاجة معناها يساوى كلمة قليل ) 


اصل كلمة سيكا 

 
كلمة سيكا تم اختراعها بواسطة الشعب المصري لكن في الحقيقة مافيش اى معلومات عنبداية ظهورها او مين اللي اخترعها او هي متداولة فين بشكل اكبر , لكن المعلومات الموجودة كلها بتأكد ان كلمة سيكا كلمة قديمة موجودة من السبعينات ويمكن قبل كده وماتسألنيش المصدر ايه لان المفروض في ثقة بينا ياصاحبي


امثلة على كلمة سيكا 



  • حاسس انى جعان سيكا 
  • حاسس انى عاوز اضربك سيكا 
  • ياسطى المكان ده بعيد سيكا 
  • الشاى حلو بس محتاج سيكا سكر
  • ياسطى القهوة زيادة سيكا انا بشربها مظبوط


معنى كلمة سيكا بالانجليزى 



كلمة سيكا معناها بالانجليزى a little bit يعنى القليل من 

معنى سيكا في الجيش



كلمة سيكا من اكتر الكلمات المنتشرة فى الجيش بين العساكر  ده ان ماكنتش اكترهم ولو حابب تعرف معناها هتلاقيه هنا ( معنى كلمة سيكا في الجيش


وبس كده ياصاحبي ده كان كل حاجة بخصوص معنى واصل كلمة سيكا ماتنساش تاخد جولة في قسم المعانى ولو عاوز تعرف معنى اى كلمة اكتب في كومنت وهكتبلك مقالة عنها اتمنى يكون الموضوع عجبك ولو استفدت وحابب تشيره مع صحابك هكون سعيد جدا  يلا سلام .
google-playkhamsatmostaqltradent