اسعار الاعلانات المموله على فيس بوك 2022 ( شرح بالتفصيل الممل )

تكلفه الاعلانات المموله


صباح او مساء الخير حسب الوقت اللي بتقرأ فيه الموضوع ، ازيك ياصاحبي عامل ايه ؟ وحشتك مش كده ؟ .. انت كمان وحشتنى علشان كده رجعتلك النهاردة بموضوع من مواضيع قسم الفيسبوك واللي قررنا انشاءه جديد في الموقع وهنضيف فيه اغلب المشاكل اللي بتقابلكم على الفيسبوك والحلول بتاعتها من ناحية الاعلانات ومن ناحية الحسابات الشخصية ومن ناحية كل حاجة . علشان كده قبل مانتكلم عن اسعار الاعلانات المموله على فيس بوك حابب اقترح عليك تاخد جولة في ( قسم الفيسبوك ) ولو عندك اى استفسار بخصوص فيسبوك ياريت تكتبلنا في التعليقات اسفل الموضوع واحنا هنجاوبك على كل اسئلتك 


اما بالنسبة لموضوع النهاردة عن اسعار الاعلانات الممولة على فيسبوك فالموضوع ده كبير جدا جدا ومتشعب جد جدا ولكن من انا هحاول اشرحه من خلال خبرتى المتواضعة علشان لو حد حابب يعمل اعلان على فيسبوك يكون عارف التكلفة علشان يقدر يحسب هل تكلفة الاعلان على فيسبوك هتغطي المصروفات وهتجيب ارباح وهل هتكون مجزية ولا غير مجزية . علشان كده حابب اقولك ان موضوع النهاردة كبير فقوم اعمل كوباية شاي او قهوة وتعالي اقولك اسعار الإعلانات المموله على الفيس . 




اسعار الاعلانات الممولة
تحديد الهدف من الاعلان على فيسبوك 




سعر الاعلان الممول على فيسبوك 


صدديقي العزيز لو انت بتدور على اجابة سريعة ومختصرة للسؤال ده فخلينى اجاوبك نفس الاجابة اللي فيسبوك بيجاوبهالك وبيقولك ياحبيب اخوك انت تقدر تعمل اعلانات ممولة من اول 5 دولار في الاسبوع لحـد 50 الـف دولار في الاسبوع يعنى الفيسبوك بيقولك معاك من 75 جنيه في الاسبوع  لحد 750 الـف جنيه في الاسبوع يعني لو انت صاحب نشاط تجاري صغير ولسا باديء ومش معاك ميزانية اعلانية كبيرة فتقدر تعمل اعلان ب 75 جنيه في الاسبوع


 وده بصراحة مالوش اى لازمة ومش هيحققلك حاجة ولكن ده اقل حاجة تقدر تستخدمها ولو انت صاحب شركة كبيرة فتقدر تمول بـ 750 الف جنيه في الاسبوع  .. وزي ماقولتلك دى الاجابة المختصرة لسؤال ماهي تكلفة الاعلانات الممولة على الفيس بوك . اما بقي لو انت حابب تعرف كل حاجة بالتفصيل الممل وبشكل متشعب فتابع الموضوع للاخر 

بص ياصاحبي قبل مانتكلم عن اسعار الاعلانات المموله على فيس بوك 2022 لازم في الاول تعرف ان كل اعلان على الفيسبوك بيكون له غرض او هدف المفروض انك توصله من خلال والاغراض دى هي 

الغرض من الحملة الاعلانية على الفيسبوك 


  • الوعي بالعلامة التجارية 
  • الوصول 

  • التفاعل
  • زيارات
  • عمليات تثبيت الطبيق
  • مشاهدات الفيديو
  •  تجميع بيانات العملاء 
  • الرسائل 

  • عمليات التحويل 
  • مبيعات الكتالوج 
  • زيارات المتجر 


وطبعا ياصااحبي علشان اشرح كل هدف من دول و وظيفته فانا محتاج كورس كامل وده مش موضوعنا ولكن لو حابين تعرفوا اكتر عن الموضوع ممكن تشوفوا كورس محمد البخاري الخاص بالفيسبوك موجود على يوتيوب مجانى هو قديم شوية ولكن الراجل مشكور بيشرح بضمير بعكس ناس كتير 


طيب نرجع للهدف من الحملة . شوفت الاهداف اللي فوق دى كلها ؟ .. كل هدف منهم له تكلفة غير التاني يعنى تلكفة اعلان رسايل غير تكلفة اعلان تفاعل غير تكلفة اعلان فيديو غير تكلفة اعلان تثبيت التطبيق يعنى على سبيل المثال لما تعمل اعلان الهدف منه الرسائل وتستهدف الفئة المطلوبة فالفيسبوك بيوجه الاعلان بتاعك للناس المهتمة بالضغط على  زر ( ارسال رسالة ) بمعنى انك لو بتبيع منتج وليكن ساعات واختارت الهدف من الحملة رسائل  وظبطت استهدافك فالفيسبوك هيوصل البوست للناس المهتمة بالساعات واللي تفاعلت قبل كده مع اعلان ساعات وضغطت على زر ارسال رسالة طيب تكلفة الاعلان الممول على فيسبوك في الحالة دى هتبقي كام بالنسبة لاعلان رسايل 



سعر الاعلان الممول على فيسبوك
نتائج اعلان رسالة لاحد عملائي المحترمين 


اسعار الاعلانات المموله على فيس بوك



خلينا ناخد مثال من احد الحملات في حسابي الاعلاني ونشرح عليه ...  لو هتعمل اعلان  الغرض منه رسائل مثلا زى اللي في الصورة اللي فوق دى وجالك عدد معين من الرسائل .. لازم تكون عارف ان الفيسبوك بيحاسبك علي الوصول ( Reach ) اللي هو ( عدد الاشخاص اللي وصلهم المنشور بتاعك ) مش علي الرسالة هوضح لحضرتك بمثال .. بمعني ان مثلا يعني لو افترضنا ان ال 1000 وصول بـ 10 ج  يعنى الفيسبوك بيقولك ياصاحبي انا هوصلك البوست بتاعك لـ 1000 واحد بـ عشرة جنيه  فمعنى كده ان الفيسبوك لو وصلك البوست لاول 2000 شخص ومحدش بعتلك رسالة 


فهو بيحاسبك علي ان  اول رسالة هتجيلك بعد كده هتبقي ب ٢٠ ج وهكذا كل ماحد يبعتلك رسالة كل مالسعر هيقل .... التفاعل قل السعر زاد ده هيبقي راجع العوامل كتير خلينى اذكر منه حاجتين على سبيل المثال وهم المحتوي + الاستهداف يعني لو البوست مش جذاب كفاية ان العميل يعمل اكشن معاه (يعنى يضغط على زر الرسال رسالة او تعليق او لايك ) 

 او لو مستهدف عميل غلط بالتالي مش هيبقي في تفاعل بالتالي سعر الرسالة هيزيد في الاول والاخر سعر الرسالة مش مقياس لنجاح الحملة .. المهم انك تكون حققت الهدف من الحملة وخلينا برده نقول ان في مجالات بيكون سعر الرسالة فيها عالي زي العقارات والسيارات وغيرهم  

اما لو انت من الناس اللي بتتأثر نفسيا بسعر الرسالة وحابب تشوف سعر رسالة قليل بغض النظر عن تحقيق الهدف من الحملة الاعلانية فاستعمل الاساليب المعروفة زي انك ماتكتبش السعر او تحط للعميل حاجة جذابة تخليه يبعتلك رسالة او جملة اسأل عن عرض الاسبوع وما الي ذلك .. 

نيجي بقي نشرح ونوضح الامور اكتر على الصورة دى . لاحظ معايا كده البوست وصل لحوالي 31000 شخص منهم 489 شخص تفاعلوا وبالمناسبة ده معدل كويس لانك لو تلاحظ سعر الرسالة 1.86 ( جنيه وستة وتمانين قرش ) هتقولي يعنى ياصاحب موقع سكرين ميكس معقول من 31000 شخص يتفاعل 489 هقولك ده الطبيعي ياحبيب اخوك بل ده معدل كويس جدا كمان لان في الاول والاخر الاعلان الممول ماهو الا بوست بيظهر للعميل وهو بيتصفح وبيسكرول داون التايم لاين يعنى ممكن يكون عدي عليها البوست وشافه وماعجبوش وممكن يكون بيقلب في الببوستات بسرعة ممكن ييكون تفاعل مع بوست تانى او هو مهتم بالخدمة والمنتج ولكن مش محتاجها دلوقتى والاسباب في الامر ده كتيرة جدا جدا ممكن نبقي نعملها موضوع لوحدها 

حساب سعر الالف وصول لاعلان فيسبوك


طيب ياصاحب سكرين ميكس انت قولتلنا ان الفيسبوك بيحاسبنا على الالف وصول تقدر تقولي الالف وصول في المثال التوضيحى بتاعك ده بكام ؟ خلينا نشغل الالة حاسبة ونشوف دلوقتى البوست وصل لـ 31000 شخص والتكلفة كانت 911 جنيه يعنى تكلفة وصوله للالف شخص كام ؟ .. لحظات معايا يافندم جاري عمل عملية حسابية .. معنى كده ان تكلفة الوصول لـ 1000 عميل كانت حوالي 29.38 جنيه ( تسعة وعشرين جنيه وتمانية وتلاتين قرش ) ودى طبعا تكلفة عالية ولكن علشان البوست رايح لعميل مهتم وكان عليه تفاعل كويس فسعر الرسالة كان كويس لكن لو التفاعل كان قليل كنت هتلاقي سعرالرسالة كبير لان من 1000 شخص هيتفاعل عدد قليل مع البوست 


عظيم جدا هل الـ 29 جنيه دى تكلفة وصول البوست لـ 1000 شخص رقم  ثابت ؟؟؟ .... اكيد لا طبعا ياصاحبي . طب ايه اللي بيحدده ؟ .. خلينى اقولك انه بيتحدد على حسب عوامل كتير زي وقت الاعلان والاستهداف ومجال المنافسة ولكن اهمها واولها هو مدى منافسة المعلنيين على تقديم نفس المنتج او الخدمة في الوقت الحالي وطبعا كل مالمنافسة زادت كل مالسعر زاد لان الفيسبوك نظام الاعلان الاساسي فيه هو نظام مزاد يعنى ادفع اكتر تظهر في الاول .. يعنى النهاردة ممكن يكون سعر الـ 1000 وصول 29 جنيه ممكن بكرة يبقي 15 جنيه لان عدد الاعلانات لنفس المنتج او نفس الخدمة مستحيل يكون ثابت يوميا  .. وبرده حسب جودة العميل بتاعك والفيسبوك مصنفه ايه هل هو عميل مميز ( A- Class ) ولا عميل عادى 

ملخص حساب تكلفه الاعلانات المموله على فيس بوك


بشكل عام علشان الخصلك الموضوع ده كله حساب تكلفة الاعلان على الفيسبوك حاجة صعبة ولكن انت تقدر تتحكم فيها مع الخبرة والوقت ولكن لو انت لسه بتتعلم فالاسهل انك تحسب مدى استفادتك من الاعلان الممول على فيسبوك يعنى هل انت استفدت من الاعلان او لا هل كان مجزى معاك او لا مثلا عملت اعلان بـ 500 ج لمدة 5 ايام .. سهل تحسب هل العائد من الاعلان غطى تكليفته وجابلك ارباح ولا لا لكن علشان تحسب تكلفة الاعلان الممول نفسه لكل مجال هتعمله اعلانات فده صعب شوية في الاول لكن مع الوقت والخبرة تقدر تتحكم انت في تكلفة الاعلان الممول نفسه .. 


وبس كده ياصاحبي ده كانت كل حاجة بخصوص تكلفة الاعلان  الممول على الفيسبوك . انت ممكن تكون توهت شوية بس انا حبييت اشرح الموضوع باستفاضة علشان لو حد حابب يستفيد اما لو مش حابب فممكن تعرف الاجابة في اول الموضوع . المهم ياصاحبي لو عندك اى استفسار بخصوص الاعلانات الممولة على فيسبوك هحكون سعيد جدا بالرد عليه في التعليقات . يلا سلاااااااااااااااااام 
تعليقات
تعليق واحد
إرسال تعليق
  • غير معرف 25 يوليو 2022 في 5:37 ص

    شكرا للتوضيح

    إرسال ردحذف



    وضع القراءة :
    حجم الخط
    +
    16
    -
    تباعد السطور
    +
    2
    -