3bbx
صباح او مساء الخير حسب الوقت اللي بتقرأ فيه الموضوع ، ازيك ياصاحبي عامل ايه وحشتك مش كده ؟ انت كمان وحشتنى علشان كده رجعتلك النهاردة بموضوع جديد من مواضيع قسم التقنية وهو عن موقع 3bbx اللي انتشر مؤخرا على السوشيال ميديا وبنلاقيه في الفيسبوك على هيئة كومنت بيقول : عايز تعرف مين زار البروفايل بتاعك على الفيسبوك وبيراقبك كل يوم ~ هتفتح جوجل وتكتب فى البحث 3BBX هتدخل اول موقع يظهرلك وتفعل الاشعارات ومن هنا بدأ الاستفسارات حول ما هو 3bbx وهل فعلا تقدر من خلاله تعرف مين زار بروفايلك ؟ وبعد ماقام عدد من فريق موقع سكرين ميكس اللي هو انا بس بالبحث عن الموضوع وعمل التجارب اللازمة قررنا نكتبلكم المقالة دى علشان نوضح فيها حقيقة موقع 3bbx.com لمعرفة مين زار بروفايلك
في البداية ياصاحبي لو انت واحد من اللي خدوا الرسالة وحطوها في 15 كومنت فيؤسفنى اقولك انك كده خلاص مابقتش صاحبي . ليه تعمل كده ؟ صدقت فعلا انك تقدر تعرف مين زار بروفايلك بالسهولة دى ؟ .. ياخسارة ياصاحبي حقيقي ياخسارة بس ولايهمك انا سامحتك خلاص علشان الصحاب بيسامحوا بعض تعالي معايا بقي اقولك حقيقية موقع 3bbx
 |
| 3bbx |
حقيقة موقع 3bbx
كيف يعمل موقع 3 bbx
موقع 3bbx.com او bbx او 3 bbx او 3 bbx او bx3 هو موقع من صفحة واحدة مبرمجة بطريقة بسيطة جدا اول مابتدخل عالموقع بتظهرلك رسالة بتقولك :الان يمكنك معرفة من زار بروفايلك بدون برامج وبطريقة مضمونه جدا وحصرية عن طريق موقعنا 3bbx.com المجانى وبيسألك سؤال بسيط
كيف تعرفت علينا ؟ وبيديك 4 اختيارات
 |
| 3bbx |
وايا كان الاختيار اللي هتختاره هيحولك على صفحة تانية بيسألك فيها ويقولك ماذا تفضل ان يظهر لك فى الاشعارات ؟
وبيديك 3 اختيارات
 |
| 3bbx |
- اسم الزائر فقط
- اسم الزائر + وقت الزيارة
- اسم الزائر + وقت الزيارة + المدة التى قضاها في حسابك
وبغض النظر عن اختيارك فبعدها هيقولك اضغط هنا للتأكد انك انسان وليس ريبوت ولما تضغط هتظهرلك قايمة هيسألك فيها سؤال لطيف جدا وهو ( جمع كلمة بلد ) وصدقنى ايا كان اللي هتكتبه حتى لو كتبت محشي ورق عنب هيحولك على صفحة مكتوب فيها
 |
| 3bbx |
تهانينا لقد تم تفعيل التطبيق بنجاح
تبقى لك خطوة اخيرة وسيبدء ظهور الاشعارات عند دخول أى شخص لحسابك
(الخــطوة الاخيرة)
انسخ الرسالة الموجودة في الاسفل وانشرها فى 15 تعليق فى الفيسبوك فى اماكن مختلفة -صفحات-جروبات
نسخ الرسالة
عايز تعرف مين زار البروفايل بتاعك على الفيسبوك وبيراقبك كل يوم ~ هتفتح جوجل وتكتب فى البحث 3BBX هتدخل اول موقع يظهرلك وتفعل الاشعارات
قم بالضغط على زر تفعيل الاشعارات علما بأن لن يتم ظهور الاشعارات بدون نشر الرسالة
↓↓↓↓↓↓↓↓
اضغط هنا لتفعيل الاشعارات الان
↑↑↑↑↑↑↑↑
موقع 3bbx لمعرفة من زار بروفايلك
ولما بتضغط على كلمة اضغط هنا لتفعيل الاشعارات بيظهرلك نافذة مكتوب فيها المعذرة، أنت لم تنشر الرسالة فى 15 تعليق مختلف على الفيسبوك ، من فضلك تأكد انك نشرت الرساله فى 15 مكان مختلف وليس نفس المكان لتفعيل الهدية وطبعا حضرتك بتروح مشكورا تنشر الرسالة في الجروبات والبيدجات وبترجع تانى علشان تضغط على كلمة تفعيل الهدية وبتلاقي حاجة من الاتنين اما بتلاقي ان مافيش حاجة حصل والاشعار بتاع انشر الرسالة في 15 جروب عمال يظهرلك او بتلاقي انه فتحلك اعلان والاعلان ده بيكون مصدر ربح الموقع وصدقنى مهما تنشر في التعليق على مواقع التواصل الاجتماعي مش هتقدر تعرف مين زار بروفايلك وهتبقي بتضيع وقت عالفاضي لان ببساطة ياصديقي حتى الان لايوجد على فيسبوك بما يسمي بمعرفة من زار بروفايلك وموقع 3bbx هو موقع غير صادق زيه زي كتير من المواقع وكل التطبيقات والمواقع اللي بتقدم خدمات زى دى هي مواقع غير صادقة والغرض من المواقع دى سرقة بياناتك واستخدامها وتقدر تقرأ المقالة دى علشان تعرف خطر استخدام المواقع اللي زى 3bbx - bbx 3 - 3bbxcom ( كيفية حماية حسابك على الفيسبوك من الاختراق )
تعليقات المستخدمين في موقع 3bbx جوجل
 |
| التعليقات المزيفة على موقع 3bbx |
طبعا صاحب الموقع علشان يضيف جزء من المصداقية كده قالك اما اعمل شوية تعليقات وصور وهمية واضيفها علشان الناس تطمن وتنفذ المطلوب منها وبيتهألي باين جدا ان التعليقات الموجودة في الموقع كلها Fake
3bbx هكر
جاتلنا كتير من الاسئلة بخصوص موقع 3 bbx ولكن اكتر سؤال كان بيتسئلنا هو هل موقع 3bbx هكر وخليني اقولك ياصاحبي انه مش هكر ومايقدرش يخترق جهازك ولكن يفضل حاول دايما تحمي نفسك وماتدخلش على المواقع اللي زي bbx#3 لان جزء كبير جدا منهم ان ماكنش كلهم بيطلب منك تحط بياناتك زي رقم التليفون وبيتم استخدامهم في الترويج لعروض CPA ويسحب رصيد منك زى خدمات العاب اونلاين فودافون
سبب انتشار موقع 3bbx
بطبيعة الحال الحاجة فيها تجسس دايما بيبقا عليا اقبال كبيرلانها بتثير الفضول اللي جواك وخصوصا لما يبقي تجسس بدون مقابل ودي النقطة اللي بيلعب عليها موقع 3bbx انه بيقولك لو عاوز تعرف مين زار بروفايلك ابحث في جوجل عن 3bbx فانت علشان ترضي فضولك بتبحث وبتدخل وبتتبع الخطوات وفي الاخر مابتوصلش لحاجة حاجة فهي دى فكرة 3bbx انه بيلعب على عاطفة الفضول عند المستخدم ولكن في الحقيقة كل ده كلام فاضي لان مافيش حاجة اسمها اعرف مين زار بروفايلك لان شركة كبيرة زى فيسبوك اكيد مش هتسيب ثغرة زي دى مفتوحة علشان يجي موقع بربع جنيه يكتشفها علشان كده مااتصدقش المواقع من نوعية 3bbx وماتخليش حد يضحك عليك
مواقع اخري غير صادقة
في مواقع كتير كلهم بيقدموا نفس الفكرة وهي فكرة النصب والاحتيال على المستخدم علشان كده احنا كتبنا مقالة عن كل موقع من المواقع دى علشان نحذر الناس منهم و دى كل المقالات اللي تم كتابتها عن المواقع دى
وبس كده ياصحبي ده كل حاجة بخصووص موضوع النهاردة حقيقة موقع 3bbx . ارجو انك بعد ماقرأت الموضوع وعرفت حقيقة موقع 3bbx.com لمعرفة من زار بروفايلك انك ماتصدقش الحاجات دى وماتمشيش وراها . ولو حبيت تشير الموضوع مع صحابك علشان تحذرهم هكون شاكر جدا يلا سلااااااااااااااااااااام
