طريقة الغاء الاشارة للجميع في الفيس بوك ( ازاي امنع حد يعملي منشن )

 صباح او مساء الخير حسب الوقت اللي بتقرأ فيه الموضوع . ازيك ياصاحبي عامل ايه وحشتنى . انا عارف ان انا كمان وحشتك علشان كده رجعتلك بموضوع جديد من مواضيع قسم الفيس بوك وبصراحة احنا مقصرين جدا في حق القسم ده ومواضيعه قليلة بس باذن الله الفترة الجايية هنكتب مواضيع كتيرتخص الفيسبوك ونجاوب على كل استفسارتكم . اما موضوع النهاردة فهوا بخصوص منشن للجميع ( @الجميع - @everyone ) وطبعا الاشارة للجميع او المنشن للجميع اوالتاج للجميع دي عبارة عن ميزة جديدة اضافها الفيسبوك في اخر تحديث للتطبيق والميزة دى تقدر من خلالها تعمل اشارة او تاج او منشن لكل الاصدقاء عندك او لاعضاء الجروب كلهم مرة واحدة وبالرغم ان في ناس كتير فرحت بالميزة دى لانها هتنفعهم في شغلهم الا ان ناس اكتر اتضايقت منها وفي موضوعنا النهاردة هعرفك كيفية الغاء الاشارة للجميع من حسابك على فيسبوك بس قبل مااقولك ازاى تمنع حد يعملك اشارة تعالي الاول نتكلم ونتناقش كده ليه فيسبوك عمل ميزة ( الاشارة للجميع ) 




ازاي امنع حد يعملي منشن -  ازاى امنع حد يعملى تاج
كيفية  الغاء الاشارة للجميع على فيسبوك


ماهي ميزة الاشارة للجميع ( @الجميع - @الاصدقاء - @everyone )


زي ماقولنا فوق ياصاحبي ان ميزة الاشارة للجميع هي ميزة ضافها الفيسبوك للمستخدم في اخر تحديث للتطبيق وتقدر من خلالها لو انت ادمن جروب انك تعمل اشارة للجميع ( @الجميع ) او تعمل اشارة للاصدقاء لو انت عضو عادى مش ادمن طب ليه فيسبوك عمل الميزة دى وايه فايدتها وايه ضررها ؟ 

فائدة ميزة الاشارة للجميع ( @الجميع - @everyone ) 


فايدة الميزة دى ياصاحبي لو انت ادمن جروب على سبيع المثال بتبيع منتجات وليكن ملابس والجروب عندك الريتش فيه قليل ومحدش بيعملك لايكات او تعليقات فانت لما تستخدم ميزة الاشارة للجميع الفيسبوك بيوصل البوست بتاعك لكل الاعضاء 
بس خلينى اقولك ياصديقي العزيز ان كل حاجة في الدنيا زى ماليها فايدة فـ برضه في منها ضرر وضرر ميزة المنشن للجميع اكتر من فايدتها لانك لو استخدمتها بشكل عشوائي وكتير بيتبعت اشعارات بشكل مستفز لاعضاء الجروب وبالتالي ده بيتسبب انهم يخرجوا من الجروب حتى لو هما مهتمين 

وفي دراسة عملتها انا واتنين صحابي عالقهوة 99% من الناس اللي استخدموا ميزة التاج للجميع بشكل عشوائي انخفض عندهم عدد اعضاء الجروب الي الربع وكل مابيستخدم الاشارة للجميع اكتر كل ماعدد الجروب بيقل اسرع وده لان الناس بتزهق من كتر المنشن وبتخرج حتى لو مهتمة بالمنتج او الخدمة اللي انت بتقدمها وفي رأيي الشخصي ان استخدام الميزة دى ماينفعش للجروبات اللي بتبيع منتجات . هي ممكن يتم استخدامها للجروبات التفاعلية لما يكون في حدث جديد او حاجة تستاهل ان الكل يعرفها لكن للجروبات التجارية فهتضرها اكتر ما هتنفعها 

وفي برضه تصريح جدعنة منى بيقول ان فيسبوك عمل ميزة المنشن للجميع دى علشان يزغلل عين اصحاب الجروبات ويجبرهم من غير مايحسوا انهم يستخدموا الميزة دى بشكل عشوائي علشان اعضاء الجروبات تقل وبالتالي يلجأ صاحب الجروب انهم يضطر يعمل اعلانات ممولة وطبعا زي مااحنا عارفين انا ميديا باير والاعلانات الممولة شغلي وبالمناسبة دى ماتنساش تاخد جولة في الموضوع ده ( اسعار الاعلانات الممولة على فيسبوك ) ده موضوع كنت كاتبه كده في ساعة روقان وان شاء الله الفترة الجاية هكتب مواضيع كتير عن الاعلانات الممولة واسعارها وازاى تعمل اعلان ممول .. المهم نرجع لموضوعنا علشان عارف انك زهقت . طيب بما انك زهقت تعالي بقي اقولك ازاى تعمل الغاء الاشارة للجميع


طريقة الغاء الاشارة للجميع فيسبوك ( ازاى امنع حد يعملى تاج )



  1. اول ماتفتح الصفحة الرئيسية في الفيسبوك هتلاقي علامة الماسنجر على شمالك تحتها هتلاقي صورة البروفايل بتاعتك وفيها تلات شرط هتضغط عليها 
  2. هيتفتح قايمة هتنزل لاخرها هتلاقي الاعدادات والخصوصية هتضغط عليها 
  3. بعدين تختار الاعدادات
  4. بعدين تضغط على اعدادات الملف الشخصي لـ ( اسم الاكونت بتاعك ) 
  5. بعدين تنزل على الاشعارات وتختار اعدادات الاشعارات 
  6. بعدين تختار الاشارات هتلاقيها معمولة على ( اي شخص ) 
  7. اختار انت ( الاصدقاء ) بعدين هيتفتحلك قايمة مكتوب فيها ( ذكر مجمع @للجميع) اضغط عليهاهيلغي تفعيلها 


وبس كده ياصاحبي دي كلها حاجة بخصوص الغاء المنشن للجميع وازاى تلغيه وايه فايدته واضراره لو استفتدت من الموضوع وحبيت تشيره مع صحابك فده شيء هيسعدنى ويشرفنى دايما وماتنساش تبقي تتصفح الموقع هتلاقي عندنا اقسام مميزة ومواضيع كتيرة عن السوشيال ميديا . اشوفكم بخير يلا سلااااااااااااااااام
تعليقات
تعليق واحد
إرسال تعليق
  • غير معرف 1 نوفمبر 2022 في 9:28 م

    اهلا

    إرسال ردحذف



    وضع القراءة :
    حجم الخط
    +
    16
    -
    تباعد السطور
    +
    2
    -