يعنى ايه ترند ؟ ( معنى كلمة ترند في السوشيال ميديا ) ما هو الترند اليوم

صباح او مساء الخير حسب الوقت اللي بتقرأ فيه الموضوع ، ازيك ياصاحبي عامل ايه وحشتك مش كده ؟ انت كمان وحشتنى علشان كده رجعتلك النهاردة بموضوع جديد من مواضيع قسم المعانى وهو معنى كلمة Trending بالانجليزي ولو انت اول مرة تزورنا في سكرين ميكس يبقي اسمحلي اقترح عليك تاخد جولة سريعة في قسم المعانى واللي هتلاقي فيه معانى لكلمات بتقابلها يوميا على السوشيال ميديا وبقت متداولة بين الشباب زي نرم و سيمب و صورم و توكسيك وغيرها كتير من المعانى فبنصحك بعد ماتعرف يعنى ايه ترند  تدخل قسم المعانى وتقرأ فيه شوية المهم علشان ماطولش عليك يلا بينا نعرف معنى كلمة ترند 


 
معنى تريند فيسبوك - معنى كلمة Trending - معنى ترند في التيك توك
 ترند في السوشيال ميديا



يعنى ايه ترند ( معنى ترند على السوشيال ميديا )


الترند ياصديقي العزيز هو الحدث الشائع او الاكثر انتشارا في الوقت الحالي والترند ممكن يكون خبر وممكن يكون اغنية وممكن يكون ملابس وممكن يكون عربية وممكن يكون اى حاجة طالعة موضة وبيتداولها عدد كبير من الاشخاص . يعنى لما مثلا لما اقولك شوفت ترند النهاردة بتاع ابو الهول وهو مغمض اهو ده بقي المقصود بكلمة ترند عبارة عن خبر او حدث بيتداوله مجموعة من الاشخاص على السوشيال ميديا او في الحياة الواقعية والحدث او الخبر ده بيفضل يثير الجدل فترة وبينتهي ويطلع حدث جديد يثير الجدل وهكذا هي دى بقت طبيعة حياتنا على السوشيال ميديا كل يوم ترند يعنى على سبيل المثال من كام يوم كان خبر انفصال احمد ابو هشيمة وياسمين صبري بعدها بشوية ابو الهول وهو مغمض وهكذا .



طيب ده كان معنى ترند على السوشيال ميديا بالنسبة للاخبار او الاحداث اللي بتثير جدل فترة طب هل ممكن الترند يبقي عربية او ملابس او ماتش كورة ؟ اكيد ياصاحبي ممكن يعنى مثلا عندك اليومين دول العربيات الصينى طالعة ترند وخصوصا الـ MG ومحققة مبيعات كبيرة في مصر يعنى لما اقول ان الـ MG ترند وكل الناس بتركبها يبقي المقصود ان الـ MG عربية منتشرة وعليها اقبال . كذلك الوضع بالنسبة للملابس وبنسمعها كتير في جروبات الاوت فت ان الاوتفت ده طالع موضة السنة دى ولو لسه مش عارف يعنى ايه اوتفت تقدر تعرف معناها من هنا ( معنى كلمة اوتفيت المنتشرة على السوشيال ميديا ) . طيب كد ه احنا عرفنا ان الترند هو الحدث الاكثر انتشارا او شيوعا . طيب ازاى اعرف ترند اليوم ؟


ماهو ترند اليوم ؟ 


المقصود بترند اليوم زى ماقولنا هو الحدث الاكثر شيوعا او انتشارا طيب هيجي واحد يسألنى ويقولي ازاى اقدر اعرف ترند اليوم هقولك بسيطة ده هيبقي متوقف على حسب انت عاوز تعرف ترند اليوم على اي بلاتفورم ؟ يعنى عاوز تعرف ترند اليوم في الفيسبوك ولا ترند اليوم على جوجل ولا ترند اليوم على تويتر ولا تريند اليوم على تيكتوك ونبدأ بترند جوجل 

ماهو ترند اليوم على جوجل ( ازاى اعرف ترند جوجل ) 


بكل بساطة ياصديقي العزيز هتضغط على ( ترند جوجل اليوم ) وهيحولك لاكتر المواضيع الترند اليوم ( العناوين الاكثر بحثا على جوجل ) وتقدر من خلال علامة الكرة الارضية تختار بلدك علشان تعرف الترند في بلدك ايه واحيانا بيكون الترند واحد في اكتر من بلد واحيانا بيكون الترند عالمي يعنى العالم كله بيتكلم عنه مش بلد واحدة وتقدر برده تبحث في جوجل عن ترند جوجل وتدخل على اول نتيجة بحث اما بقي لو عاوز تبحث عن كلمة معينة وتعرف امتى الكلمة دى كانت ترند فتقدر تعرف ده من هنا ( استكشف ما يبحث عنه العالم

وبرده من ضمن الخدمات اللي جوجل بتقدمها في موضوع الترند هو جوجل هوت سيرش وده بقي ياصاحبي بيجيبلك اللي الناس بتبحث عنه في خلال ساعة او كام دقيقة وتقدر تعرفه هنا ( عمليات البحث الرائجة الان )  طيب ده كده كل حاجة بخصوص جوجل نيجى بقي لعمنا تويتر 

ترند اليوم تويتر ( ازاى اعرف ترند تويتر ) 


بخصوص تويتر فتقدر تعرفه بكل سهولة القائمة الجانبية في تويتر واللي بيقي مكتوب عليها ( ماذا يحداث او What happen) واللي بيكون فيها اكتر الهاشتجات المستخدمة من خلال مستخدمين تويتر ) طيب ده تويتر ماذا عن تيك توك ؟ 

ترند اليوم تيكتوك ( ازاى اعرف ترند تيك توك ) 


اما بقي تريند تيك توك فتقدر تعرفه من خلال الديسكفر ولو مش هتعرف توصله فتقدر توصله من هنا ( ترند التيكتوك اليوم ) هتيجي تقولي كده فاضل فيسبوك ياصاحبي

ترند اليوم فيسبوك 


 خلينى اقولك ياحبيب اخوك ان فيسبوك لسه لحد وقت كتابة المقالة دى بتاريخ 15/5/2022 لسه مافيش اوبشن صريح تقدر تعرف من خلال اكثر عمليات البحث الان على فيسبوك ولكن عموما احنا بنعرف ترند الفيسبوك من غير حاجة من الزيطة اللي بتحصل في اى ترند او من تقدر تعرفه برده من خلال ترند جوجل وترند تويتر 

مواقع اخري لمعرفة الترند 


طبعا في مواقع واضافات كتير تقدر تعرف من خلالها ترند اليوم لكن موقع ( trend24 ) بيعتبر من افضل امواقع اللي بتقدم خدمة الترند لانه بيديك اوبشن تحديد الدولة اللي انت عاوز منها الترند وبيجيبلك اخر الهاشتجات المتداولة في اخر دقيقة واخر ساعة واخر ساعتين واخر تلات ساعات واخر اربع ساعات وهكذا يعنى بينقلك الترند على مدار الساعة طيب انتا اكيد دلوقتى في سؤال بيدور في بالك وهو انا هستفاد ايه لما اعرف الترند ؟ 

ماهي اهمية معرفة ترند اليوم 


طبعا ياصاحبي اهم حاجة بتخليك تتابع الترندات هو علشان تستخدمها في التسويق الالكترونى سواء لموقعك او لمنتجك او لقناتك عاليوتيوب او لحسابك علي التيكتوك الخ.... يعنى اهمية معرفة ترند اليوم تكمن في التسويق والاستفادة منه لجلب المشاهدات 
وبس كده ياصاحبي ده كان كل حاجة بخصوص معنى كلمة في السوشيال ميديا ماتنساش تاخد جولة في قسم المعانى زى ماتفقنا ولو حابب تعرف معانى لكلمات اكتر اكتبلنا في التعليقات وهنجاوبك فووووورا يلا سلاااااااااااااااااااااااااااااام ...

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -