ازاي اسحب فلوس من فودافون كاش ؟

الصفحة الرئيسية

كيفية سحب فلوس من فودافون كاش





صباح الخير في يوم من الايام في وقت من الاوقات في فترة من الفترات في سنة من السنين تحديدا سنة 2021 كنت لسه عامل شغل لعميل عندى وبعتلي فلوسه على فودافون كاش ولو انت لسه ماتعرفش حاجة عن خدمة فودافون كاش وازاى تشترك فيها وازاى تبعت فلوس من محفظتك لمحفظة تانية فلازم تقرأ الموضوع ده ( كل ماتريد معرفته عن خدمة فودافون كاش )



 المهم ياصاحبي انا ماكنتش عارف اسحب الفلوس ازاى وكنت خايف اعمل حاجة غلط تضيع الفلوس عليا وعلى الفور اتصلت بصديقي رامي اللي شغال في خدمة عملاء فودافون كاش وسألته ازاي اسحب فلوس من فودافون كاش وبعد مكالمة طويلة مدتها عشر دقايق وللاسف انا اللي كنت متصل قررت اكتب الموضوع ده علشان اقولك كيفية سحب فلوس من فودافون كاش فتابع معايا الموضوع للاخر يلا بينا 


سحب فلوس من فودافون كاش
سحب فلوس فودافون كاش من atm




في البداية لازم الاول تعرف ايه هي خدمة فودافون كاش وازاى تبعت لحد فلوس بعد كده هقولك  طريقه سحب فلوس فودافون كاش اللي هي عبارة عن طريقتين السحب من خلال ماكينات ATM و السحب من اقرب فرع فودافون ليك 

ماهي خدمة فودافون كاش 


خدمة فودافون كاش هي خدمة مقدمة من شركة فودافون لارسال واستقبال الاموال داخل مصر بطريقة سريعة من خلال تليفونك او من خلال ماكينات فوري وامان او من خلال فروع فودافون في المحافظات

طرق السحب والايداع في فودافون كاش 


علشان تسحب وتودع فلوس في محفظة ڤودافون كاش زور اقرب فرع ڤودافون أو موزع معتمد عنده علامة ڤودافون كاش أو فروع فوري و أمان أو من ماكينات الصراف الآلي لبنك الإسكندرية، البنك الأهلي المصري، بنك مصر، بنك القاهرة، بنك عودة أو البنك التجاري الدولي دول اللي من خلالهم تقدر تعمل اي عملية سحب او ايداع لفودافون كاش 


خدمات فودافون كاش الاخري


  1. السحب والايداع من خلال ماكينات ATM 
  2. تجديد باقات فودافون 
  3. دفع فواتير الغاز والمياة والكهرباء
  4. الشراء اونلاين في العديد من المواقع مثل جودادي
  5. شحن الرصيد او دفع فاتورة تليفونك
  6. التبرع للمؤسسات الخيرية 


ولو حابب تعرف اكتر عن خدمة فوودافون كاش وازاى تشترك فيها وترسل الفلوس من محفظة لمحفظة فالموضوع ده فيه كل حاجة عن فودافون كاش ( ازاى احول فلوس فودافون كاش ) ودلوقتى بقي نيجي لـ طريقة سحب فلوس فودافون كاش 


كيفية سحب فلوس من فودافون كاش



سحب فلوس فودافون كاش عن طريق فرع فودافون 


في الطريقة دى ياصاحبي كل اللي عليك انك هتروح اقرب فرع خدمة عملاء فودافون وتدخل تقول لممثل خدمة العملاء عاوز اسحب فلوس من محفظة فودافون كاش هيقولك قول رقمك هتقوله رقمك بعدها هيقولك استأذنك في البطاقة هتديله بطاقتك بعدها هيقولك اكتب الكود ده ولما تكتب الكود اللي هيقولك عليه هتظهرلك قائمة بتكتب فيها رقمك السري وتأكد العملية هيكون هوا بيعد الفلوس وهيديهالك علطول ومبروك عليك ياصاحبي الطريقة التانية هتكون طريقه سحب فلوس فودافون كاش من atm


كيفية سحب فلوس فودافون كاش من atm



في الطريقة دى كل اللي بتعمله انك بتروح على اى ماكينة Atm تابعة للبنوك دى :-


  • بنك الاسكندرية
  • البنك الاهلي
  • بنك مصر
  • بنك القاهرة
  • بنك عودة 
  • البنك التجاري الدولي 


دول اللي من خلالهم تقدر تعمل اي عملية سحب او ايداع لفودافون كاش ، هتروح اي ماكينة Atm وقبل ماتقف عالماكينة تطلع موبايلك وتدخلا الكود ده ( *9*# ) | نجمة تسعة نجمة شباك | واختار المزيد بعدها اختار رقم 5 السحب عن طريق Atm بعدها هتدخل المبلغ اللي عاوز تسحبه بعدها تكتب الرقم السري بتاعك هيديك رقم مكون من 6 ارقام  لحد هنا دور الموبايل خلص خليك فاتحه على الرقم هنحتاجه بعدين .


 دلوقتى جه دور ماكينة الـ ATM هتقف على الماكينة وتختار العمليات بدون كارت واللي بيختلف اسمها من ماكينة للتانية ولكن هتلاقيها غالبا العمليات بدون كارت بعدها تختار سحب نقدي بعدها هيقولك ادخل رقم هاتفك هتدخل رقم الهاتف بتاعك بعدها هيقولك ادخل المبلغ المراد سحبه هتدخل نفس المبلغ اللي دخلته على الموبايل  ( اوعي تدخل مبلغ تانى )  بعدها هيقولك ادخل الرقم السري للمعاملة هتدخل الرقم السري اللي طلعلك اللي هو عبارة عن 6 ارقام ( ركز بتدخل الرقم السري اللي طلعلك عالموبايل مش الرقم السري بتاع محفظتك )



 بعدها هتسمع احلي صوت في حياتك وهو صوت عد الفلوس  وبس كده ياصاحبي ده كان كل حاجة بخصوص موضوعنا النهاردة ازاى اسحب فلوس من فودافون كاش ماتنساش تاخد جولة سريعة في قسم الاكواد واللي بالمناسبة هتلاقي فيه جميع الاكواد اللي ممكن تحتاجها للاشتراك او الغاء الاشتراك في خدمات زى الكول تون والالعاب وفودافون كاش وغيرها كتير يلا سلام 
google-playkhamsatmostaqltradent